Бекетов ауылында яңы фельдшер-акушерлыҡ пункты асылды

Башҡортостан Республикаһының Ҡырмыҫҡалы районы Бекетов ауылында яңы фельдшер-акушерлыҡ пункты асылды. Был ауылда, шулай уҡ Вязовка ауылында йәшәгән 500-ҙән ашыу кеше хәҙер бында "Һаулыҡ һаҡлау" милли проекты сиктәрендә төҙөлгән яңы медпунктҡа йөрөйәсәк. Элек пункт урындағы хакимиәт бинаһында урынлашҡан булған һәм заманса талаптарға яуап бирмәгән. Фельдшер булмағас та, ул бер нисә йыл эшләмәгән. Әлбиттә, һәр кем медицина учреждениеһына һирәгерәк килергә теләй, ләкин фельдшер Гүзәл Хәсәнова ауырыуҙарҙы иҫкәртеүҙән мөһимерәк бер нәмә лә юҡ тип иҫәпләй. Шуға күрә сәләмәтлекте һәм дөрөҫ йәшәү рәүешен, туҡланыуҙы һаҡлау һәм, әлбиттә, медицина хеҙмәттәре күрһәтеү мәсьәләләре буйынса халыҡҡа кәңәштәр бирергә әҙер. Был көн Гүзәл Хәсәнова өсөн икеләтә шатлыҡлы булды. Республиканың һаулыҡ һаҡлау министры Айрат Рәхмәтуллин уға лайыҡлы награданы – "Башҡортостан Республикаһының һаулыҡ һаҡлау отличнигы" билдәһен тапшырҙы. Бөгөн ул ике фельдшер-акушерлыҡ пункты мөдире – Илтуғанда, хәҙер Бекетовта ла эшләй. Ә районға Булгаков ҡасабаһынан килеп йөрөгән фельдшер "Ауыл фельдшеры" программаһы сиктәрендә 2019 йылдан эшләй. Өҫтәүенә уның тармаҡта 30 йылдан ашыу стажы бар. Фельдшер пунктының яңы бинаһы асылған көндө үк Гүзәл Салауат ҡыҙы килгән кешеләрҙе ҡабул итергә әҙер. Һәр кем тейешле консультация алды. Билдәле булыуынса, “Һаулыҡ һаҡлау” (национальный проект “Здравоохранение”) милли проекты Рәсәй Президенты Владимир Путиндың май указы менән булдырылды. Фото: Ҡырмыҫҡалы районы хакимиәте.