Йөрәк әрнеүе
Никах уҡытҡас, ирем менән (улайтып атарға буламылыр инде уны), ярты йыл ғына йәшәп ҡалдыҡ. Беҙ бер йылдан ашыу йөрөнөк. Унан бер фатирға инеп, икәүләп йәшәй башланыҡ. Уның ата-әсәһе быға бер ҙә ҡаршы түгел ине. Ләкин минекеләр ризаһыҙлыҡ белдерҙе. Әсәйем: “Гражданский брак тигән нәмә ирҙәргә генә рәхәт ул. Бер ниндәй бурысы юҡ һинең алдыңда! Йәшәп - йәшәп, ҡулланып - ҡулана ла, ташлап китә лә бара. Ә балағыҙ булһа!”-тип әрләне.
Атайым да бик асыулы булғас, никах уҡытырға булдыҡ. Шул саҡта уның әсәһе: “Нимәгә артыҡ сығымдар? Туйға аҡса эшләгәстәр, барыһын бергә үткәрерҙәр ине әле”,-тине. Миңә шул саҡта аҡылыма килергә кәрәк булған да бит! Шулай ҙа әҙ-мәҙ кеше йыйып, никах уҡытҡан булдыҡ. Мулланы ла өйгә саҡырманылар, ә мәсеттә генә булды.
Әсәйем: “Былар һиңә улының кәләшенә ҡараған кеүек тә түгелдәр. Һалҡындар”,-тигәс ҡыйын булды. Әммә әсәй хаҡлы булған. Мин эшләп фатирға әйберҙәр тултырҙым. Ул аҡсаһын үҙенә генә тотондо. Ата-әсәһе уны ҡунаҡҡа айырым, минһеҙ генә саҡырҙылар һәр саҡ. Бала табыуҙы планға ҡуймаһаҡ та, минең ауырлы булыуым асыҡланды. Мин бит юрамал түгел! Ҡайһы саҡта дарыуҙар ҙа ярҙам итә алмай икән. Тик ир тигән нәмәм шунан һуң үҙгәрҙе лә ҡуйҙы. “Аборт эшләт!”-тигәс барғайным, миңә әгәр ауырымдан ҡотолһам, башҡа сабыйым булмауы ихтимал тине гинеколог.
Шунан һуң башланды! Әсәһе менән апаһы килеп мине эттән-эткә һалып һүгеп китте. Хәҙер мин яңғыҙым йәшәйем. Ир тигән нәмә миңә өйләнмәйәсәген былай тип белдерҙе: “Мин былай ғына йәшәп торорбоҙ тип уйлағайным. Сөнки ашарға бешереүе, өҫтөмдө йыуыуы ҡыйын ине. Бала, бәлки, минән дә түгелдер. Әсәйем дә шулай ти”.
Сабыйымды ҡалдырырға булдым. Әммә ул тыуғас, ДНК-тест эшләтеп, үҙен алиментҡа ата-әсәһен, апаһын, миңә нахаҡ бысраҡ яҡҡандары өсөн, судҡа бирәсәкмен.
Регина С.
"Һаҡмар" гәзите сайтынан.