Ишле ғаиләләрҙең бәхете лә ишле

Балалы ғаиләләр Башҡортостан халҡы һанының үҫешендә ҙур роль уйнай. Улар – йәмғиәтебеҙ нигеҙе. Тап ғаиләләрҙә яуаплы, эшһөйәр һәм илһөйәр балалар тәрбиәләнә. Башҡортостанда демографик хәлде нығытыу һәм балалар, уларҙың ата-әсәләре өсөн йәшәү шарттарын яҡшыртыу маҡсатында ғаилә институтына ярҙам итеү буйынса сәйәсәт алып барыла. Башҡортостан – Волга буйы федераль округы төбәктәре араһында күп балалы ғаиләләр һаны буйынса лидер. Һуңғы ун йылда республикала күп балалы ғаиләләр һаны 59 меңгә етте, үҫеш 27,5 процентҡа артты. Был күрһәткес буйынса Башҡортостан Волга буйы федераль округында – беренсе, Рәсәйҙә етенсе урын биләй. “Балалар тәрбиәләнгән 230 меңдән ашыу ғаилә төрлө ташламаларҙан файҙалана, ә ай һайын бирелгән бала тыуыу һәм уны тәрбиәләү буйынса пособиеларға түләүҙәргә быйыл 25 миллиард һумдан ашыу аҡса бүлдек”, - тип белдерҙе Башҡортостан Башлығы Радий Хәбиров. Былтыр, Рәсәй Президенты Владимир Путиндың Указына ярашлы, Дәүләкән ҡалаһынан 11 бала әсәһе Гөлназ Ҡорманаева ғаилә институтын нығытыуға һәм балалар тәрбиәләүгә индергән ҙур өлөшө өсөн “Герой-әсә” исеменә лайыҡ булды. Дәүләкән районында йәшәгән Гөлназ менән Айнур Ҡорманаевтар – республикабыҙҙың ишле һәм өлгөлө ғаиләләренең береһе. Былтыр яҙ уларҙың 11-се балаһы – ҡыҙҙары Ынйы тыуғайны. Гөлназды күптәр күп бала әсәһе тип кенә түгел, әүҙем йәмәғәтсе, ойоштороусы булараҡ та белә һәм хөрмәт итә. Ҡорманаевтар балаларын төрлө яҡлап үҫтереүгә, спорт, ижад йәһәтенән һәләттәрен асыуға ла ҙур иғтибар бүлә. Әйткәндәй, күп балалы һәм аҙ тәьмин ителгән ғаиләләр мәктәп формаһы һатып алған өсөн компенсация алырға хоҡуҡлы. Бының өсөн түбәндәге документтар кәрәк: - ғариза; - паспорт; - ата-әсәнең икенсеһенең паспорты, 14 йәшкә тиклемге балаларҙың тыуыу тураһындағы таныҡлығы, 14 йәштән 18 йәшкә тиклемге балаларҙың тыуыу тураһында таныҡлығы һәм паспорты; - мәктәп формаһы һатып алыуҙы раҫлаған чектар; - Республика халыҡҡа социаль ярҙам күрһәтеү үҙәге филиалынан ғаиләгеҙҙең аҙ тәьмин ителгәндәр категорияһына ҡарауын раҫлаған белешмә. Өфөлә йәшәмәһәгеҙ, уны Күп функциялы үҙәктә алырға мөмкин. Өс һәм унан да күберәк балаға опекун (попечитель) булһағыҙ, һеҙгә шулай уҡ түбәндәге документтар кәрәк буласаҡ: - балаға опека (попечителлек) тәғәйенләү тураһындағы ҡарар; - балаларҙы ҡарау өсөн аҡса алмауығыҙ тураһында опека һәм попечителлек органдарынан документтар. Ғариза һәм документтарҙы 2024 йылдың 1 октябренә тиклем балаларығыҙ уҡыған мәктәпкә тапшырырға кәрәк. Компенсацияның иң ҙур суммаһы — 4 489 һум. Уны ике уҡыу йылына бер тапҡыр алырға мөмкин. Фотолар: Ҡорманаевтарҙың шәхси архивынан. Гөлназ ҠОРМАНАЕВА, күп балалы әсәй: - Балаларыбыҙҙың һәр ҡайһыһының үҙ холҡо, үҙенә генә хас сифаттары бар. Ата-әсә булараҡ, һәр беребеҙҙең тәү сираттағы бурысы – балаларыбыҙҙың һәләттәре тулыһынса асылыуға ярҙам итеү.