Федераль эксперттар фекеренсә, һайлауҙа ғәмәлдәге төбәк башлыҡтары еңәсәк

Сәйәси тикшеренеүҙәргә махсуслашҡан Социаль тикшеренеүҙәр эксперт институты (ЭИСИ) “Һайлау - 2024: һуңғы фараз” түңәрәк өҫтәле йомғаҡтарын баҫтырып сығарҙы. Эксперттар, социология мәғлүмәттәренә таянып, Рәсәй төбәктәре башлыҡтарын һайлау һөҙөмтәләре буйынса фараз бирҙе. Хәтерегеҙгә төшөрәбеҙ, сентябрҙә Рәсәй Федерацияһының 25 субъектында һайлау үтәсәк. Беренсе тезис– һайлауға, тәү сиратта губернатор һайлауына, халыҡ яғынан ҡыҙыҡһыныу бик юғары. “Башинформ” мәғлүмәт агентығы хәбәр иткәнсә, Башҡортостанда һорау алыуҙа ҡатнашҡан халыҡтың 78 проценты алдағы һайлау тураһында хәбәрҙар, 64 проценты һайлауға барырға ниәтләй, тағы 16 проценты был хаҡта уйлай. Башҡа төбәктәрҙә лә шундай уҡ һөҙөмтәләр күҙәтелә: Вологда өлкәһендә халыҡтың - 77 проценты, Калининград өлкәһендә 81 проценты һайлау тураһында белә. Артабан эксперттар һайлау кампанияһы осоронда һайлаусыларҙың лозунгтарға ҡарағанда конкрет эштәргә яҡшыраҡ яуап биреүен һыҙыҡ өҫтөнә ала. Алдағы тауыш биреү референдум характерында буласаҡ, ғәмәлдәге төбәк башлыҡтары һәм был вазифаны ваҡытлыса башҡарыусылар һайлауҙың беренсе турында еңәсәк. "Социологик тикшеренеүҙәр мәғлүмәттәренән сығып, асыҡ күренә: кешеләр Президенттың кандидаттарын хуплай һәм ҡатмарлы осорҙа власть тирәләй берләшә", – тиелә Социаль тикшеренеүҙәр эксперт институты мәғлүмәтендә. Был тезисты эксперттар социологик тикшеренеүҙәр мәғлүмәттәре менән нығыта. Мәҫәлән, Йәмәғәт фекере фондының һорау алыу мәғлүмәттәре буйынса, һорау алыныусыларҙың 80 проценты – Башҡортостандың ғәмәлдәге Башлығы Радий Хәбировтың, 78 проценты - Ырымбур өлкәһе губернаторы Денис Паслерҙың, 83 проценты - Хабаровск крайы губернаторы вазифаһын ваҡытлыса башҡарыусы Дмитрий Демешиндың еңеүе өсөн тауыш биргән. Бындай тенденция башҡа төбәктәрҙә лә асыҡ күҙәтелә. Хәтерегеҙгә төшөрәбеҙ, Башҡортостан Мәҙәниәт министрлығының Гуманитар тикшеренеүҙәр үҙәге үткәргән социологик һорау алыу мәғлүмәттәре буйынса, Һорау алыныусыларҙың 78 проценты Радий Хәбиров өсөн тауыш бирергә ниәтләй. Был хаҡта мәғлүмәттәр менән ошо һылтанмалар аша инеп таныша алаһығыҙ: https://t.me/eisragenda/3867, https://t.me/eisragenda/3883. Фото: Социаль тикшеренеүҙәр эксперт институты (ЭИСИ)