Башҡортостандың өлгөһөн Рәсәйгә тараталар

Башҡортостан Башлығы Радий Хәбиров 2021 йылда уҡ “Арт-Ҡоролтай” мәҙәниәт форумында “Ауыл мәҙәниәт хеҙмәткәре” республика программаһын иғлан итте. Ҡыҫҡа ваҡыт эсендә 120 мәҙәниәт белгесе Башҡортостан Республикаһы бюджеты иҫәбенә торлаҡ шарттарын яҡшырта алды. Субсидия күләме тәүге осорҙа 500 мең һум тәшкил итһә, 2023 йылдан 1 миллион һумға еткерелде. Программала ҡатнашҡан иң йәш белгестәрҙең береһе – 20 йәшлек китапханасы Эвелина Байбурина. Ул Шишмә районының Келәш ауылындағы биләмә-ара китапханала эшләй. – Китапҡа һөйөү әсәйемдән күсте. Ул үҙе лә, полиция капитаны булыуға ҡарамаҫтан, хаҡлы ялға сыҡҡандан һуң тормошон китпхана эше менән бәйләне, – тип һөйләне Эвелина “Башҡортостан” гәзитенә. Йәш белгес Мифтахетдин Аҡмулла исемендәге Башҡор дәүләт педагогия университеты колледжында китапханасыға уҡыған. Әле Өфө дәүләт фән һәм технологиялар университетының башҡорт филологияһы, журналистика һәм шәрҡиәт факультетында ситтән тороп белем ала. – Китапханаға балалар ҙа, ололар ҙа теләп йөрөй. Көн дө тиерлек мәҙәни саралар ойошторабыҙ, уларҙың күпселеге илһөйәрлек темаһына һәм, әлбиттә, данлыҡлы ауылдашыбыҙ – Башҡортостандың халыҡ шағиры Мостай Кәримдең ижадына арнала, – ти китапханасы. Эвелина Байбурина “Ауыл мәҙәниәт хеҙмәткәре” программаһы буйынса алған 500 мең һумлыҡ субсидияны шәхси йорт һатып алған саҡта иғәнә итеп ҡулланған. Мәсетле районы Мәҙәниәт йортоноң мәҙәни-агитация бригадаһы етәксеһе Илнур Хизбуллин шулай уҡ 500 мең һумлыҡ субсидияға эйә булған. – Йорт һалған саҡта бындай дәүләт ярҙамы бик урынлы булды, төҙөлөш материалдары алдыҡ. Киләһе йыл өй туйларға ниәтләйбеҙ, – тип уртаҡлашты белгес. Илнур Илфат улы 2008 йылда Стәрлетамаҡ мәҙәни-ағартыу колледжын тамамлаған һәм тыуған районында мәҙәниәт хеҙмәткәре булып эш башлаған. Ғаилә ҡороп, ике балаға атай булғас, уға матди хәлде яҡшыртыу өсөн илдең икенсе төбәктәрендә автокран машинысы булып эшләргә тура килгән. – Һуңғы йылдарҙа республика етәкселеге мәҙәниәт өлкәһенә йөҙ менән борола башланы, был беҙгә – мәҙәниәт хеҙмәткәрҙәренә дәрт өҫтәй, ғаиләләребеҙ эргәһендә эшләргә мөмкинлек бирә, – тине артист “Башҡортостан” гәзитенә. “Ауыл мәҙәниәт хеҙмәткәре” республика программаһында 35 йәшкә тиклемге белгестәр ҡатнаша ала. Улар Башҡортостандың 50 меңгә тиклем халҡы булған ауыл йәки ҡалаһында йәшәргә һәм мәҙәниәт өлкәһендә муниципаль мәҙәниәт һәм өҫтәмә белем биреү учреждениеларында эшләргә тейеш. Тағы ла хеҙмәткәрҙең профилле белеме булыуы һәм 2021 йылдан мәҙәниәт өлкәһендә тулы ставкаға эшкә урынлашыуы мөһим. Субсидия алған белгестәр урындарҙа кәмендә биш йыл эшләргә тейеш буласаҡ – был төп ҡағиҙә.