30 августа Республика Йортонда Абхазия Президенты Аслан Бжания менән Башҡортостан Башлығы Радий Хәбировтың эшлекле осрашыуы үтте. Көн тәртибендә – халыҡ-ара хеҙмәттәшлекте нығытыу һәм берлектәге проекттарҙы тормошҡа ашырыу мәсьәләләре. Башҡортостан Башлығы үҙ-ара эш итеүҙе үҫтереүҙең юғары потенциалын билдәләне һәм алдағы йылдарға хеҙмәттәшлекте киңәйтеү буйынса юл картаһын әҙерләү хаҡында хәбәр итте. – Хеҙмәттәшлектең төп йүнәлештәренең береһе – ул туризм. Былтыр Башҡортостандан пенсионерҙарҙың пилот төркөмө “Башҡортостан-Абхазия оҙон ғүмерлелеге” программаһы буйынса Абхазияға барҙы. Бик яҡшы баһа бирҙеләр. Шуға күрә хәҙер беҙ Сухум аэропортын төҙөүҙе тамамлауҙарын һәм ике яҡҡа туристар ағымын арттырыу өсөн Өфөнән Абхазияға тура рейс асылыуын көтәбеҙ, – тине төбәк етәксеһе Радий Хәбиров. – Беҙҙең үҙ-ара сауҙабыҙ ҙа киңәйә. Абхазия шарабы һәм емеш-еләк һатыу күләме арта. Абхазия баҙарында Башҡортостан предприятиелары уңышлы эшләп килә. Улар киң халыҡ ҡулланыуы тауарҙары линейкаһын һата. Шулай уҡ Абхазияны ит продукцияһы, көнбағыш һәм аҡ май, рапс, шәкәр, биопрепараттар һәм ашламалар менән тәьмин итеү буйынса яҡшы мөмкинлектәр бар. Аслан Бжания Башҡортостан халҡын Өфөнөң 450 йыллығы менән ҡотланы һәм уртаҡ башланғыстарҙы киңәйтеүгә ҡыҙыҡһыныу белдерҙе. – Абхазия менән Рәсәй араһында тығыҙ мөнәсәбәттәр булдырылған, һәм һеҙҙең ил менән бәйләнештәрҙе нығытыу –беҙҙең өсөн тәү сираттағы бурыс. Башҡортостан менән беҙҙе күптән дуҫлыҡ ептәре бәйләй, – тине Аслан Бжания. – Бөгөн беҙҙең делегация Өфөнөң Ситуация үҙәгендә булды, унда барыһы ла бик технологик һәм ҡыҙыҡлы. Был ҡала етәкселегенең халыҡты хеҙмәтләндереү кимәлен күтәрә. Бындай миҫалдарҙы, әлбиттә, үҙләштерергә тырышасаҡбыҙ. Ә Өфөлә төҙөлгән ғәйәт ҙур Колоннада халыҡтарыбыҙ араһында дуҫлыҡ ҡомартҡыһына һәм яҡшы ял урынына әүереләсәк. Осрашыу һуңында Башҡортостан Башлығы Радий Хәбиров Абхазия Президентын 2024 йылдың 11 октябрендә Республика көнөндә Башҡортостан һәм Абхазия халыҡтары дуҫлығы хөрмәтенә Колоннаданы тантаналы асыуға саҡырҙы. Фото: Башҡортостан Башлығы сайты.