Игорь Комаров "Ватанды һаҡлаусылар" фондында булды

Бөгөн Өфөлә Рәсәй Президентының Волга буйы федераль округындағы тулы хоҡуҡлы вәкиле Игорь Комаров һәм Башҡортостан Башлығы Радий Хәбиров “Ватанды һаҡлаусылар” дәүләт фондының республика филиалында булды. Хәтерегеҙгә төшөрәбеҙ, 2023 йылдың апрелендә Рәсәй Президенты Владимир Путин махсус хәрби операция ветерандарын һәм яугирҙәрҙең ғаиләләрен шәхси оҙатыу өсөн дәүләт фонды булдырыу тураһындағы указға ҡул ҡуйҙы. Өфөлә ойошманың офисы 2023 йылдың 1 июнендә Минһажев урамы, 107 адресы буйынса эшләй башланы. Ошо ваҡыт эсендә филиалға 58 меңдән ашыу мөрәжәғәт килгән, шуларҙың 55 меңгә яҡыны – хәл ителгән. Учреждениеның комплекслы оҙатыуында 1 318 махсус хәрби операцияла ҡатнашыусы, шулай уҡ һәләк булған яугирҙәрҙең ғаиләләре тора. Филиал штатында – 97 социаль координатор, уларҙың туғыҙы – үҙәк бүлексәлә, 88 кеше республиканың барлыҡ муниципалитеттарында эшләй. Улар иҫәбендә - хәрби хәрәкәттәр ветерандары, МХО-ла ҡатнашыусыларҙың ғаилә ағзалары. Үҙәк “берҙәм тәҙрә” принцибы буйынса эшләй, тип һөйләне төбәк филиалы етәксеһе, Башҡортостан Дәүләт Йыйылышы – Ҡоролтай депутаты Гөлнур Ҡолһарина. Фонд белгестәре ветерандарға бөтә ярҙам сараларын алырға ярҙам итә, шул иҫәптән медицина һәм социаль реабилитация, дарыуҙар менән тәьмин итеү, психологик ярҙам, шулай уҡ кәрәкле техник реабилитация саралары һәм шифахана-курорт дауаланыуы. Ветерандарҙы ҡайтанан уҡытыуҙа һәм эшкә урынлаштырыуҙа булышлыҡ итеү, көнкүреш мәсьәләләрен хәл итеүҙә ярҙам күрһәтеү ҙә – төп бурыстар иҫәбендә. Фонд махсус хәрби операция яугирҙәрен илһөйәрлек тәрбиәһе биреү, тарихи хәтерҙе һаҡлау буйынса йәмәғәт проекттарында ҡатнашыуға йәлеп итә. Бынан тыш, “Ватанды һаҡлаусылар” дәүләт фонды филиалы республика муниципалитеттарында “Ярҙам поезы”, Ғаилә ҡунаҡханаһы”, “Ипповенция – ауыр тормош хәлендә ҡалған ғаиләләргә ресурс” һәм башҡа социаль проекттарҙы тормошҡа ашыра. Һуңғы ике проектты Башҡортостан Башлығы гранттары фонды хупланы. Өфөләге 2-се стоматология поликлиникаһының баш табибы “Яугирҙең сәләмәт йылмайыуы” уникаль проектын ғәмәлгә ашырыу хаҡында һөйләне. Медицина ярҙамының был төрө хәрби хеҙмәткәрҙәрҙә бик тә талап ителә. Шулай уҡ фондтың филиалы 3-сө балалар стоматология поликлиникаһы менән республика буйынса МХО-ла ҡатнашыусыларҙың балаларын тикшереү тураһында килешеү төҙөнө. Рәсәй Президентының Тулы хоҡуҡлы вәкиле һәм Башҡортостан Башлығы юристар, психологтар, социаль хеҙмәткәрҙәрҙең эш кабинеттарын ҡараны, МХО хеҙмәткәрҙәре һәм ветерандары менән аралашты. Көн һайын “Ватанды һаҡлаусылар” фонды филиалына 30-лаған кеше мөрәжәғәт итә, телефон аша белгестәр 150-нән ашыу консультация бирә. Башҡортостан Башлығы Радий Хәбиров республикала Махсус хәрби операция ветерандары ассоциацияһының төбәк бүлексәһен асырға йыйыныуҙары хаҡында һөйләне. Был төбәккә ҡайтҡан ветерандарҙы илдең һәм республиканың ижтимағи тормошона йәлеп итергә, үҫеп килеүсе быуынды тәрбиәләүгә булышлыҡ итергә мөмкинлек бирәсәк. Яңы ассоциацияның кураторҙары – төбәктең ғәмәлдәге ветерандар ойошмалары. Игорь Комаров “Ватанды һаҡлаусылар” фондының Өфөләге филиалының мөмкинлектәрен юғары баһаланы һәм махсус хәрби операция ветерандарына, унда ҡатнашыусыларға, уларҙың ғаилә ағзаларына комплекслы ярҙам күрһәтеү буйынса эштең һөҙөмтәлелеген билдәләне. Фото: Башҡортостан Башлығы сайты.