Тотош донъяла ул берәү генә!

Өфөлә баш ҡалабыҙҙың 450 йыллыҡ юбилейына арналған объекттарҙың береһе – Көрәш һарайы – тантаналы асыла. Рәсәйҙә генә түгел, донъяла иң ҙур көрәш объекттарының береһе Өфөнөң Октябрь районы биләмәһендә Муса Гәрәев, Архитектор Рехмуков, Рудольф Нуриев һәм Комсомол урамдары сиктәрендә урынлашҡан кварталда төҙөлә. Бинаның дөйөм майҙаны – 28 мең квадрат метр. Бында спорт комплексы, спорт көрәше мәктәбе, трибуналары булған, 3400 кешегә иҫәпләнгән универсаль зал, спортсылар өсөн ҡунаҡхана, конференциялар өсөн зал һәм башҡалар урынлашасаҡ. Көрәш һарайы фронтонында Боронғо Грецияның ике көрәшсеһен һынландырған барельеф ҡуйылған. Муса Гәрәев урамынан ингән яҡта скульптура ансамбле бар. Унда төрлө алымдар ҡулланған спортсылар һындары төшөрөлгән. Улар яңы Көрәш һарайында шөғөлләнеп буласаҡ спорт төрҙәрен күрһәтә. Скульптура ансамбле һәм барельефтар авторы – билдәле скульптор, Рәсәй Федерацияһының халыҡ рәссамы, Рәсәйҙең самбо буйынса спорт мастеры Салауат Щербаков. Өфөләге Көрәш һарайы стадионға йәки ғәҙәттәге спорт комплексына оҡшамаған. Был – колонналары, архитектура элементтары, скульптура композициялары булған һарай. Уның концепцияһы ниндәйҙер кимәлдә антик тарихты хәтерләтә - унда ла Боронғо Греция көрәшселәрен һынландырған барельефтар бар. Марат ХӨСНУЛЛИН, Рәсәй Хөкүмәте Рәйесе урынбаҫары: - Һоҡланам, бик матур проект. Был – донъя кимәлендәге объект. Ул илебеҙҙә лә, донъяла ла лайыҡлы урын биләйәсәк. Бик яҡшы концепция, идеология һәм дөрөҫ алым. Уның торлаҡ биҫтәһендә урынлашыуы ҡыуандыра. Башҡортостан Башлығы Радий Хәбировты, уның командаһын һәм барлыҡ көрәшселәрҙе ҡотлайым. Үҙем дә көрәш менән шөғөлләндем, шуға ошондай проекттарҙың барлыҡҡа килеүе ҡыуандыра. Көрәшселәребеҙҙең үҙ йорто барлыҡҡа киләсәк. Ул халыҡ-ара федерациялар тарафынан йыһазландырылған һәм лицензияланған. Шуға күрә бында халыҡ-ара, федераль һәм төбәк кимәлендәге спорт һәм ирекле көрәш, самбо, дзюдо, милли көрәш, Көнсығыш алыштары буйынса ярыштар үткәреп буласаҡ. Вәкил ИЛЬЯСОВ, РСФСР чемпионаттарында күп тапҡыр еңеү яулаусы, призлы урындарға лайыҡ булыусы, республиканың күп тапҡыр абсолют чемпионы, Башҡортостан Республикаһының Көрәш һәм билбаулы көрәш буйынса федерация президенты, спорт мастеры, атҡаҙанған физкультура һәм спорт хеҙмәткәре: - Заманса масштаблы Һарайҙың асылыуы – тотош башҡорт халҡына ҙур бүләк һәм милли көрәш үҫешендә ҙур этәргес. Элек көрәшселәребеҙ өсөн бындай яҡшы залдар юҡ ине, хәҙер уңайлы шарттар тағы күберәк егеттәрҙе – буласаҡ чемпиондарҙы – күнекмәләр менән шөғөлләнеүгә этәрәсәк. Республика Башлығы Радий Хәбиров башҡорт халҡы өсөн көрәштең нимә аңлатҡанын һәм уның үҫеше өсөн ниндәй ярҙам кәрәклеген яҡшы аңлай Һөҙөмтәлә беҙҙә йылдан-йыл яҡшы призлы ярыштар үткәрелә, башҡа төбәктәрҙән тәжрибә тупларға киләләр. Салауат ЩЕРБАКОВ, Рәсәй скульпторы, Рәсәй Художество академияһы академигы, Рәсәй Федерацияһының халыҡ рәссамы: - Өфөнөң күп кенә музей, тарих һәм ҡала тормошо буйынса оҙайлы тарихы бар. Хәҙер яңы этап бара - кварталдар әүҙем төҙөлә, был үҫеш өсөн яңы көс бирә. Был – бик дөрөҫ тенденция. Көрәш һарайы ҡалаға тормош өсөн кәрәк. Ул яңы биҫтәне йәнләндерә һәм балаларға, өлкәндәргә спорт менән шөғөлләнеү өсөн яңы мөмкинлектәр аса. Һарай антик стилдә төҙөлгән. Мин уның өсөн самбо, дзюдо, билбаулы көрәш, ирекле һәм грек-рим көрәше менән шөғөллләнеүсе спортсыларҙы һынландырҙым. Был – илебеҙҙә күпләп кеше шөғөлләнгән биш спорт төрө. Һәр төркөмдә айырым спорт төрөн һынландырған һүрәт бирелгән. Сығанаҡ, фото: “Башинформ”.