Инвестиция сәғәттәре – Башҡортостан Республикаһы Башлығы Радий Хәбировтың башланғысы менән индерелгән иң тәүге тармаҡ сәғәте. Үҙенең йоғонтоло булыуын күрһәткәс, ошо формат башҡа күп өлкәләрҙә лә эш алымы итеп индерелде. Инвестиция сәғәттәре – уникаль система ҡоралы, уны ҡулланыуға индереү инвестиция проекттарын тормошҡа ашырыуҙы тиҙләтергә, юғары етәксенән гарантиялар алырға һәм ведомство-ара характерҙағы ҡатмарлы мәсьәләләрҙе хәл итергә мөмкинлек тыуҙыра. Инвестиция сәғәттәре ултырыштарында республиканың власть органдары, урындағы үҙидара һәм Башҡортостанда эшҡыуарлыҡты үҫтерергә булышлыҡ иткән башҡа ойошма вәкилдәре ҡатнаша. Инвестиция сәғәттәре власть менән бизнес араһында уңайлы диалог булдыра. Ә был иһә төбәккә капитал ҡыҙыҡһыныуҙы арттыра, яңы эш урындары асыу мөмкинлеге тыуҙыра, был, үҙ сиратында, эшһеҙлек кимәлен түбәнәйтә һәм социаль-иҡтисади хәлде яҡшырта. Инвестиция сәғәттәре инвестпроекттарҙы ҡарау ваҡытын ҡыҫҡарта, артабан дәүләт ярҙамы ла тиҙләтелә. Һөҙөмтәлә, һуңғы йылдарҙа республика инвестиция кимәле буйынса Рәсәйҙә иң алдынғылар рәтенә күтәрелде. Радий ХӘБИРОВ, Башҡортостан Республикаһы Башлығы: “Инвестсәғәт” форматындағы кәңәшмәләр инвесторҙар менән хеҙмәттәшлек итеүҙәге йоғонтоло алым булып тора, ул идара итеүҙә тиҙ ҡарар ҡабул итеү мөмкинлеге лә бирә. Беҙ бындай осрашыуҙарҙы 2018 йылдан алып үткәрәбеҙ һәм уларҙан ыңғай һөҙөмтә булғанын күрәбеҙ”. (Башҡортостандың Инвестиция комитетындағы сығышынан, 2024 йылдың 13 марты). ФЕКЕР Әлфиә Кузнецова, Башҡортостан Республикаһының Стратегик тикшеренеүҙәр институты директорының ғилми эш буйынса урынбаҫары: “Башҡортостан сәнәғәт сәйәсәтен тормошҡа ашырыуҙа Рәсәй төбәктәре араһында алдынғы урындарҙа килә. Шуға күрә лә беҙҙең республика инвестиция һалыу өсөн ылыҡтырғыс төбәк иҫәпләнә. Сәнәғәт сәйәсәтенең һөҙөмтәһе кимәле системалы дәүләт ярҙамынан тора. Был осраҡта Башҡортостан Башлығы үткәргән “Инвестиция сәғәттәре” хәл иткес роль уйнай”. Фото: Башҡортостан Республикаһы Башлығы сайты.