Мәғлүм булыуынса, Өфөлә йәшәгән 59 йәшлек ҡатынға бер ҡатын шылтыратҡан. Таныш булмаған ханым ниндәйҙер хат тураһында һөйләй, шулай уҡ смс-хәбәрҙә ебәрелгән кодты әйтеүҙе һорай. Ҡатын, аптырап, уның бөтә һорауҙарына яуап бирә, шунан һуң аралашыу тамамлана. Икенсе көндә төшкө аш ваҡытында уға тағы шылтыраталар. Ир үҙен тәфтишсе итеп таныштыра һәм ҡатынға уның исеменән кредит алырға тырышыуҙары һәм мутлашыуға юл ҡуймау өсөн уны үҙенә рәсмиләштерергә кәрәк, тип әйтә. Артабан ҡатынға финанс мониторингы хеҙмәте хеҙмәткәре бәйләнешкә инә. Таныш булмаған кеше ҡатынды банкка ебәрә. Унда ул уларҙың күрһәтмәһен үтәй – 450 мең һум күләмендә кредит уның иҫәбенә күсә, әммә был учреждениела аҡсаны ҡулаҡсаға әйләндереү мөмкин булмай. Шул саҡта мутлашыусылар аҡса алып булған икенсе банктың адресын хәбәр итә. Унда ҡатын финанс ойошмаһы хеҙмәткәре янына килә һәм унан ярҙам һорап мөрәжәғәт итә. Банк хеҙмәткәре Юлия Владимировна шикләнеп, ҡатынға һорауҙар бирә башлай. Әңгәмә барышында хеҙмәткәр уның мутлашыусылар йоғонтоһонда булыуын аңлай һәм кредитты аҡсалата бирмәй, полиция хеҙмәткәрҙәрен саҡыра. 5-се полиция бүлеге начальнигы вазифаһын ваҡытлыса башҡарыусы полиция подполковнигы Алексей Герасимов “Сбербанк” асыҡ акционерҙар йәмғиәтенең хеҙмәтләндереү буйынса өлкән менеджеры Юлия Владимировна Бирюзоваға рәхмәт белдерҙе һәм Рәсәй Эске эштәр министрлығының Өфө ҡалаһы буйынса идаралығы начальнигы вазифаһын ваҡытлыса башҡарыусы полиция полковнигы Илгиз Байсурин исеменән рәхмәт хаты тапшырҙы. Бөгөнгө заманда банк хеҙмәткәрҙәренә ошолай уяу булырға кәрәк. Фото: Башҡортостан буйынса Эске эштәр министрлығының матбуғат хеҙмәтенән.