40 йыл мөғжизә эҙләгәндә

Бөгөн хөрмәтле хеҙмәттәшебеҙ – “Башҡортостан” гәзитенең фотохәбәрсеһе, Башҡортостандың атҡаҙанған матбуғат һәм киң мәғлүмәт саралары хеҙмәткәре, Шәһит Хоҙайбирҙин премияһы лауреаты, Рәсәйҙең һәм Башҡортостандың Журналистар союзы ағзаһы Айрат Билал улы Нурмөхәмәтовҡа 60 йәш тулды. Ошо айҡанлы Өфөләге Матбуғат йортонда Айрат Билал улының юбилейына һәм Өфө ҡалаһының 450 йыллығына бағышланған “40 йыл мөғжизә эҙләгәндә” тип аталған фотокүргәҙмә асылды. “Һәләтле һәм үҙенсәлекле фотограф”, – тип әйтәләр уның хаҡында хеҙмәттәштәре. 1985 йылдан ул “Башҡортостан” гәзитенең алмаштырғыһыҙ фотохәбәрсеһе булып тора. Республика тормошондағы бөтә төп ваҡиғаларҙы, төбәктең социаль-иҡтисади, ижтимағи, сәнәғәт үҫеше уның объективы аша үткән. Айрат Нурмөхәмәтов күргәҙмә өсөн үҙенең фотоархивынан Өфөгә ҡағылышлы иң сағыу кадрҙарҙы һайлап алған. Фотохәбәрсенең шәхси күргәҙмәһе асылыуы менән уның хеҙмәттәштәре, ижадташ дуҫтары ҡотлап сығыш яһаны. Башҡортостандың Журналистар союзы рәйесе, “Башҡортостан” гәзитенең баш мөхәррире Вәдүт Ғәйфулла улы Исхаҡов Айрат Билал улын тыуған көнө һәм күргәҙмәһе асылыуы менән ҡотлап, эшендә ижади уңыштар теләне һәм Башҡортостан Журналистар союзының Почет грамотаһын тапшырҙы. Күргәҙмәне асыу тантанаһында сығыш яһағандарҙың барыһы ла фоторәссамдың юғары һөнәри оҫталығын һәм уның шәхси сифаттарын юғары билдәләп үтте, шулай уҡ ижади ҡарашының үҙенсәлеге хаҡында ла йылы һүҙҙәр әйтелде. Хеҙмәттәштәре иһә Айрат Билал улының ижадының нигеҙендә эшенә, кешеләргә һәм ваҡиғаларға тәрән һөйөү ятыуын, тирә-яҡтағыларҙың кисерештәрен сағылдырыуын билдәләп: “Һәр фотоһы – ул бәләкәй генә тарих, күп нәмә тураһында һөйләгән һәм һәр йәндә ҙур эҙ ҡалдырған мәл”, – тип фекерҙәрен уртаҡлашты. “Башҡортостан” гәзите хеҙмәткәрҙәре лә Айрат Нурмөхәмәтовты ғүмер байрамы менән ихлас күңелдән ҡотлай. Хөрмәтле Айрат Билал улы! Һеҙҙе күркәм ғүмер байрамығыҙ – матур юбилейығыҙ менән ихлас күңелдән ҡайнар ҡотлайбыҙ! Һеҙгә һаулыҡтың иң ныҡлыһын, бәхеттең иң олоһон, ғүмерҙең иң оҙонон теләйбеҙ! Беҙ һеҙҙе оло йөрәкле, киң күңелле, тәрән аҡыллы, сабыр холоҡло хеҙмәткәр, тип беләбеҙ. Ғүмер буйы намыҫлы эшләп, абруй һәм хөрмәт ҡаҙанып, матур хеҙмәт юлынан бараһығыҙ. Инде 40 йыл дауамында республикабыҙҙың йылъяҙмаһын фоторәсемдәр аша теркәп киләһегеҙ, бөгөн дә республиканың төп баҫмаһы – “Башҡортостан” гәзитенә тоғро хеҙмәт итәһегеҙ, ҡабатланмаҫ фоторәсемдәрегеҙ менән уның битен биҙәйһегеҙ. Хәстәрлекле, уңған ғаилә башлығы, яратҡан атай ҙа һеҙ. Киләсәктә лә аҡ бәхеттәр, сәләмәтлек, күңел тыныслығы теләйбеҙ, яҡындарығыҙға терәк-таяныс, кәңәшсе булып, шатлыҡ-ҡыуаныста ғына йәшәргә насип итһен Хоҙай Тәғәлә. Донъя мәшәҡәтен еңә килдең, Бирешмәнең ҡырыҫ елдәргә. Тырышлығың, эшкә ихласлығың, Һүрелмәһен ғүмер-ғүмергә. Тәбрикләйбеҙ юбилейың менән, 60 йәш – ул сәскә саҡ ҡына. Ташып торған йәшлек дәрте менән Ең һыҙғанып йәшәр саҡ ҡына. Иң изге теләктәр менән “Башҡортостан”дар. Динар КӘЛИМУЛЛИН, Рәмилә МУСИНА фотолары.