2024 йылдың аҙағына тиклем Башҡортостанда махсус хәрби операцияла ҡатнашыусыларға һәм уларҙың ғаилә ағзаларына социаль ярҙам сараларын электрон төргә күсереү планлаштырыла. Республика Хөкүмәтендә үткән аҙналыҡ оператив кәңәшмәлә Башҡортостан дәүләт идаралығының һанлы үҫеш министры Геннадий Разумикин ошо хаҡта хәбәр итте. Шулай уҡ кәңәшмәлә ведомство-ара мәғлүмәттәр менән электрон алмашыу мәсьәләләре тикшерелде. 2024 йылда төбәктең Һанлы үҫеш министрлығы 17 яңы сервисҡа тоташҡан, шул иҫәптән Рәсәй Оборона министрлығы тәҡдим иткән махсус хәрби операцияла ҡатнашыуҙарын раҫлаған сервис та. Геннадий Разумикин билдәләүенсә, Башҡортостанда йәшәүселәр дәүләт хеҙмәттәрен электрон төрҙә алыу өсөн йышыраҡ мөрәжәғәт итә башлаған. Әйтәйек, 2023 йыл йомғаҡтары буйынса республика дәүләт хеҙмәттәре алыу өсөн интернетты файҙаланыу күрһәткесе буйынса Рәсәйҙә 10-сы урынды алды, был төбәкте һанлаштырыуҙың юғары кимәлен раҫлай. Дәүләт органдары менән эш итергә кәрәк булған республика халҡының 95,3 проценты быны «Дәүләт хеҙмәттәре» һанлы платформаһы ярҙамында эшләне, был 2021 йыл менән сағыштырғанда 22 процентҡа күберәк. Республика Һанлы үҫеш министрлығы 2020-2024 йылдар осоронда «Дәүләт хеҙмәттәре» порталында 85, шул иҫәптән социаль өлкәлә 26 күмәк хеҙмәт урынлаштырған. - Беҙ кешеләр ошо хеҙмәттәр буйынса ғаризаларҙың 99,4 процентын электрон формала йүнәлтһен өсөн техник мөмкинлектәр тәьмин иттек, - тип билдәләне Геннадий Разумикин. Кәңәшмәлә ҡатнашыусылар муниципалитеттарҙың дәүләт хеҙмәттәрен һанлаштырыу өлкәһендәге эшен яҡшыртыуға айырым иғтибар бүлде. 2024 йылда төбәктә муниципаль хеҙмәттәрҙе электрон төрҙә күрһәтеү өлөшө 2021 йыл менән сағыштырғанда 24 процентҡа артҡан. Шул уҡ ваҡытта ҡайһы бер муниципалитеттарҙа түбән күрһәткестәр күҙәтелә. Шуның менән бәйле Башҡортостан Башлығы Радий Хәбиров ошо өлкәләге һөҙөмтәләрҙе артабан яҡшыртыуҙың мөһимлеген һыҙыҡ өҫтөнә алды һәм республика Хөкүмәтенә ҡала һәм район башлыҡтары менән өҫтәмә кәңәшмәләр уҙғарырға ҡушты. - Дәүләт хеҙмәттәренең 90 проценттан ашыуын электрон төрҙә күрһәткән муниципалитеттар бар. Түбән күрһәткестәргә өлгәшкән райондар ҙа шундай уҡ яҡшы һөҙөмтәләргә өлгәшә ала, - тип билдәләне Радий Хәбиров. Фото: Башҡортостан Башлығы сайты.