Рәсәй Үҙәк һайлау комиссияһына бер ялыу ҙа килмәгән

Уҙған ялдарҙа Башҡортостанда, бөтә илдәге кеүек үк өс көн дауамында тауыш биреү үтте. Мөһим сәйәси кампания етешһеҙлектәрһеҙ үтһен өсөн унда йәмәғәт күҙәтеүселәре әүҙем эшләне. Республикала был эштең нисек ойошторолоуы һәм үтеүенә арнап бөгөн матбуғат конференцияһы үтте. Унда республиканың Йәмәғәт палатаһы рәйесе Данияр Абдрахманов, уның урынбаҫары, Башҡортостанда һайлауҙар барыуын күҙәтеү буйынса Йәмәғәт штабы етәксеһе Лида Исаргакова һәм палата ағзалары ҡатнашты. – Башҡортостан был һайлауҙар өсөн 13 меңдән ашыу йәмәғәт күҙәтеүсеһе әҙерләне. Уларҙың күбеһенең бынан алдағы сәйәси кампанияларҙа эшләү тәжрибәһе бар. Күҙәтеүселәәр махсус рәүештә уҡыны һәм төплө әҙерлек үтте. Дөйөм алғанда, Башҡортостанда һайлау һәр ваҡыттағы кеүек ойошҡан үтте, закон боҙоу осраҡтары, етешһеҙлектәр булманы тиерлек. Кампанияны ойошторған һәм үткәргән бөтә кешеләргә ҙур рәхмәт, – тине Данияр Абдрахманов. Лида Исаргакова һөйләүенсә, күҙәтеүселәрҙең күпселеге һуңғы йыл ярымда үткән өс ҙур сәйәси кампанияла ҡатнашты һәм ҙур тәжрибә тупланы. – Рәсәй Үҙәк Һайлау комиссияһына Башҡортостандан бер ялыу ҙа бармаған! Бында күҙәтеүселәрҙең дә өлөшө бар. Башҡортостанда тауыш биреү асыҡ, ғәҙел үтте,– тине ул. Йәмәғәт палатаһы ағзаһы Рита Некрасова был көндәрҙә Сибай ҡалаһында булған һәм унда һайлау барышын күҙәткән. Уның белдереүенсә, Сибайҙа һәм коллегалары әйтеүенсә, Баймаҡ районында тауыш биреү тыныс шарттарҙа үткән, етешһеҙлектәр булмаған. Фото: Йәмәғәт палатаһы.