6, 7 һәм 8 сентябрҙә Башҡортостанда республика Башлығын, шулай уҡ район һәм ҡала советтары депутаттарын һайлау уҙҙы. Был көндәрҙә республиканың ҡала һәм райондарында 3 302 һайлау участкаһы эшләне. Ә Мәскәү ҡалаһында республиканың тулы хоҡуҡлы вәкиллегендә тәүге тапҡыр шундай участка булдырылды. Төбәктә барлығы 218 һайлау кампанияһы – Башҡортостан Башлығын, өҫтәмә республика һәм урындағы үҙидараның вәкәләтле органдарына депутаттар һайлау буйынса барлығы 218 кампания ойошторолдо. Һайлауҙы ойоштороуға 28 мең самаһы һайлау комиссияһы ағзаһы йәлеп ителгән. Башҡоростандың Үҙәк һайлау комиссияһы рәйесе Азат Ғилемханов брифингта журналистарҙы һуңғы мәғлүмәттәр менән таныштырҙы. Башҡортостан Республикаһы Башлығын, өҫтәмә 54-се Өфө бер мандатлы округы буйынса етенсе саҡырылыш Башҡортостан Республикаһы Дәүләт Йыйылышы – Ҡоролтай депутатын өҫтәмә һайлау, шулай уҡ ҡала округтары советтары депутаттарын һайлау – ете, муниципаль район Советтары депутаттарын һайлау – 54, ҡала биләмәләре Советтарына депутаттар һайлау – 10, ауыл биләмәләре советы депутаттарын һайлау – 42, ҡала округтары советтары депутаттарын өҫтәмә һайлау – бер, ауыл биләмәләре советтары депутаттарын һайлау буйынса 102 кампания үтте. Урындағы һайлау буйынса территориаль һайлау комиссиялары йомғаҡ яһай, ул мәғлүмәттәр һуңыраҡ буласаҡ, тип белдерҙе республиканың Үҙәк һайлау комиссияһы рәйесе. Һайлау кампаниялары буйынса яҡынса һөҙөмтәләр түбәндәгесә. Республика Башлығын һайлауҙа халыҡ түбәндәгесә тауыш биргән: - Радий Фәрит улы Хәбиров (“Берҙәм Рәсәй”) – 80,21 процент; - Иван Константинович Сухарев (ЛДПР) – 4,98 процент; - Владимир Александрович Нагорный (“Ғәҙел Рәсәй”) – 4,26 процент; - Артур Альберт улы Шәйнуров (КПРФ) – 6,95 процент; - Илшат Марат улы Тимерйәнов (“Яңы кешеләр”) – 2,60 процент. Башҡортостан Республикаһы Дәүләт Йыйылышы – Ҡоролтай депутатын өҫтәмә һайлау буйынса яҡынса һөҙөмтәләр: - Ләйсән Рәсүл ҡыҙы Ғарипова – 18,93 процент; - Илдус Наил улы Улмутаев – 25,27 процент; - Эльвира Александровна Мацкевич – 54,55 процент. Һайлауҙың яҡынса һөҙөмтәләре түбәндәгесә. Һайлаусыларҙың 72,3 проценты (2153513 кеше) тауыш биреүҙә ҡатнашҡан. Шул иҫәптән, Мәскәүҙә республиканың тулы хоҡуҡлы вәкиллегендә лә һайлау участкаһында 298 кеше үҙенең һайлау хоҡуғын файҙаланған. Өфө ҡалаһы райондары араһында иң юғары тауыш биреүҙе Калинин районы һайлаусылары күрһәткән (69,01 процент), ҡалалар араһында – Стәрлетамаҡ ҡалаһы һайлаусылары (71,98 процент), райондар араһында – Баҡалы районы һайлаусылары (93,01 процент). Һайлау участкаларында тауыш биреү көндәрендә 11 873 күҙәтеүсе ҡатнашҡан, шуларҙың 461-е – кандидаттарҙан, 5 719-ы – сәйәси партияларҙан, 5 693-ө – йәмәғәт контроле субъекттарынан. Бынан тыш, һайлау участкаларына тауыш биреү көндәрендә киң мәғлүмәт сараларының 241 вәкиле килгән. Иҫкәртәбеҙ, был яҡынса мәғлүмәттәр. Һуңғы йомғаҡлау һандарын Башҡортостан Үҙәк һайлау комиссияһы рәсми рәүештә иғлан итәсәк. Фото: vk.com/clubbashkortostanizbirkom