Мәсетлеләрҙә изге йола барлыҡҡа килгән: махсус хәрби операцияла ҡатнашҡан яҡташтарына ҡумыҙ бүләк итәләр. – Әлеге мәлдә 200-ҙән ашыу яҡташыбыҙ махсус хәрби операция биләмәһендә Ватаныбыҙ именлеге өсөн көрәшә. Яугирҙәребеҙ, ҡайһы милләттән булыуҙарына ҡарамаҫтан, ҡумыҙ-бүләкте ҙур ҡыуаныс менән ҡабул итә. “Һеҙгә тыуған яғыбыҙҙың бер өлөшөн тапшырабыҙ. Ул күңелегеҙҙе йылытып йөрөһөн, моңдары менән үҙегеҙҙе һәм иптәштәрегеҙҙе рухландырһын” тигән теләктәрҙе еткерәбеҙ, – ти район хакимиәте башлығы Әнис Әсәҙуллин. Мәсетлеләр милли башҡорт уйын ҡоралы ҡумыҙҙы райондың символы тип иҫәпләй. Был төбәк халҡыбыҙға донъяның виртуоз ҡумыҙсыларын – Роберт Заһретдинов менән Миңлеғәфүр Зәйнетдиновты биргән. Ағас һәм тимер ҡумыҙҙа уйнаусыларҙың иң тәүге яҙмалары ла ошо ерлектә яһалған. Төбәк-ара ҡумыҙсылар һәм өзләүселәр конкурсы иһә райондың брендына әүерелде. Шулай уҡ мәсетлеләр үҙҙәрендәге ҡумыҙ музейы менән ғорурлана. Яҡташтарының йолаһын Башҡортостандың халыҡ артисы Миңлеғәфүр Зәйнетдинов та хуплай