Шишмә районында РФ Президенты ҡарамағындағы Кеше хоҡуҡтары буйынса совет рәйесе урынбаҫары Ирина Киркора булды. Уның етәкселегендәге эшсе төркөм ике һайлау участкаһына мониторинг үткәрҙе. Иң тәүҙә улар Келәш ауылындағы күп функциялы клубта урынлашҡан һайлау комиссияһында булды. Участка һайлау комиссияһы рәйесе Руфина Мусина делегацияны тауыш биреү барышы менән таныштырҙы. Ирина Киркора фойела ҙур вазаларҙа күп итеп баҡса сәскәләре тороуына иғтибар итте. Участка һайлау комиссияларының йәмәғәт күҙәтеүселәре тауыш биреүҙең күпселек һайлаусылар өсөн тәү сиратта байрам булыуын билдәләне, улар һайлауға үҙҙәренең участкаларында үҫтерелгән сәскәләр менән килә һәм комиссия ағзаларына рәхмәт, яҡшы кәйеф билдәһе итеп бүләк итә. Делегацияны Келәш ауылының яңы быуын китапханаһы статусын йөрөткән моделле китапханаһы ла хайран ҡалдырҙы. – Бындай ауыл китапханаһын тәүге тапҡыр күрәм, ул уҡыусылар өсөн бик күп мөмкинлектәр тәҡдим итә. Мөхите, өйҙәге кеүек йәмле, заманса, шундай яҡты. Бында ҡабат-ҡабат килергә теләйем, - тине Ирина Владимировна Келәш ауыл китапханаһы мөдире Гөлфинә Ямалетдиноваға саҡырыуы өсөн рәхмәт әйтеп. Келәш ауылына Ирина Киркораға сәфәр хаҡында иҫтәлеккә бөйөк яҡташыбыҙ Мостай Кәримдең китабын бүләк иттеләр. Ирина Владимировна һайлаусылар менән дә аралашып өлгөрҙө. Фәрит Хәмзин ауыл тарихы һәм һуңғы бер нисә йылда булған үҙгәрештәр тураһында хәтирәләре менән уртаҡлашты. Етәкселеккә, халыҡтың мәҙәни мираҫына айырым иғтибар биреүҙәренә рәхмәт белдерҙе. Фәрит Хәмзин ауылда ҡунаҡсыл кешеләр йәшәүен билдәләне һәм ҡунаҡтарҙы үҙҙәренә бер сынаяҡ сәйгә саҡырҙы. Ләкин тығыҙ графигы арҡаһында Ирина Киркораға баш тартырға тура килгән. Эш сәфәрендә Ирина Киркорҙы йәмәғәт штабы ағзаһы, БР Йәмәғәт палатаһы ағзаһы Ынйы Әхмәҙуллина һәм район Советы секретары Надежда Емец оҙатып йөрөнө. Ынйы Ревилевна Ирина Владимировнаның кеше хоҡуҡтарын тормошҡа ашырыуҙа ҙур тәжрибәгә, белемгә эйә булыуын билдәләне: – Ул һайлау участкаларында һайлаусылар, күҙәтеүселәр менән аралашыуға ҙур иғтибар бүлде һәм, республикала эшһөйәр, үҙ эшен яратҡан, эскерһеҙ кешеләр йәшәй һәм ижад итә, тип билдәләне, - тине Ынйы Әхмәҙуллина. РФ Президенты ҡарамағындағы Кеше хоҡуҡтары буйынса совет рәйесе урынбаҫары Ирина Киркора етәкселегендәге рәсми делегация һайлауҙарҙы күҙәтеү буйынса Йәмәғәт хәл-ваҡиғалар үҙәгенең эше һәм Шишмә ҡасабаһындағы 3358-се участка һайлау комиссияһы менән танышты. Йола буйынса, ҡунаҡтарҙы ҡурай моңо аҫтында милли кейемдәге ҡыҙҙар ҡаршы алды. Һәр участкала тантаналы шарттар, тауыш биреүселәрҙең һәм участка һайлау комиссияһы ағзаларының һайлау процесына ыңғай, йылы мөнәсәбәте һайлауҙарҙың мөһим өлөшө булып тора, тип билдәләне Ирина Киркора. Әйткәндәй, һәр һайлау комиссияһында тиерлек өс көнгә саралар планлаштырылғайны. Райондың мәҙәниәт йортонда көҙгө йәрминкәләр ойошторолдо, урындағы һәм саҡырылған артистар ҡатнашлығында концерттар үтте. Мәҫәлән, бөгөн 3358-се участка һайлау комиссияһында Чебурашка балаларға мандариндар таратты һәм кескәйҙәр уның менән рәхәтләнеп фотоға төштө. Районда һайлауҙар тыныс үтә, халыҡ әүҙем тауыш бирә, тип һыҙыҡ өҫтөнә алды Шишмә районы хакимиәте башлығы Ришат Мансуров. Ришат Әнис улы һайлауҙа ҡатнашыусыларҙың барыһына ла: участка һайлау комиссиялары ағзаларына, ирекмәндәргә, күҙәтеүселәргә, һайлаусыларға яуаплы мөнәсәбәттәре өсөн рәхмәт әйтте.