Башҡортостанда һайлау участкалары 20.00 сәғәттә ябылды. Беҙҙе өс көн көсөргәнешлектә тотҡан, шул уҡ ваҡытта байрам бүләк иткән һайлау кампанияһы артта ҡалды. Әлегә Мәскәү ҡалаһындағы һайлау участкаһы ғына ябылманы - ул Мәскәү ваҡыты менән 20.00 сәғәттә ябыласаҡ. Республиканың Үҙәк һайлау комиссияһында Башҡортостандағы һайлауҙың 18.00 сәғәткә ҡарата тәүге һөҙөмтәләре менән уртаҡлаштылар. Һуңғы яңылыҡтар менән БР Үҙәк Һайлау комиссияһы рәйесе урынбаҫары Марат Ғәҙелов таныштырҙы. Башҡортостан Үҙәк һайлау комиссияһының мәғлүмәт үҙәге мәғлүмәттәре буйынса, 8 сентябрҙә 18 сәғәткә һайлаусылар исемлегенә индерелгәндәрҙең 69,18 проценты — 2,059 миллиондан ашыу кеше тауыш биргән. Мәскәүҙәге экстерриториаль участкала Мәскәү ваҡыты буйынса 16.00 сәғәткә 300-ҙән ашыу һайлаусы тауыш биргән. Был участкала тауыш биреү дауам итә, унда тауыш биреү Мәскәү ваҡыты буйынса 20.00 сәғәткә тиклем дауам итә, тип белдерҙе Марат Ғәҙелов. “Мобиль һайлаусы” буйынса ғариза биргән 43713 кешенең 35595-е тауыш биреү хоҡуғын файҙаланған. Һайлаусыларҙың әүҙемлеге буйынса беренсе урында Баҡалы районы. Унда һайлау хоҡуғы булған граждандарҙың 89,29 проценты ҡатнашҡан, икенсе урында Салауат – 86,44 процент, өсөнсө урында Федоровка районы – 86,1 процент. Ҡалалар араһында беренсе урында Стәрлетамаҡ – 68,1 процент, икенсе урында Ағиҙел – 67, 37 процент, өсөнсө урында Күмертау – 54, 44 процент. – Был яҡынса мәғлүмәттәр. Хәҙер тауыштарҙы иҫәпләү башлана, – тип өҫтәне Марат Ғәҙелов. Рәмилә МУСИНА фотоһы. #Выборы2024 #Башкортостан