“Башҡортостан” ҡунаҡханаһында һиҙелерлек йәнлелек тойола: бында “Рәхмәт” акцияһында бүләк отҡан кешеләр килгән. Күптәр бындай ваҡиғаға балаларын да алған. Ике малай менән килгән ғаилә Нефтекаманан булып сыҡты. Люзиә һәм Артур Фәйезовтар аҡыллы колонка отҡан. Колонка тураһында бәләкәй Дамир хыялланған икән, ағаһы Әмир ҙә бүләкте уға бирергә ризалашҡан. Әлбиттә, бүләкте ғаиләләре менән бергә файҙаланасаҡтар. – Һайлауға 6 сентябрҙә үк барҙыҡ, алты билет биргәйнеләр, бөтәһен дә теркәнек. Тик бына “еңдегеҙ” тип шылтыратҡастар, тәүҙә ышанманыҡ. Шулай ҙа ойоштороусылар нисектер ышандырҙы һәм килдек. Дөрөҫөн әйткәндә, һуңғы минутҡа тиклем ышанып етмәй инек. Бүләккә бик шатбыҙ. Әйткәндәй, былтыр ҙа “Рәхмәт” тә ҡатнашҡайныҡ, тик унда еңә алманыҡ, – ти Люзиә Фәйезова. Ҙур “Алиса” станцияһын Дыуандан Лидия Устюгова отҡан. Ул ғаиләһе менән һайлауға 6 сентябрҙә барған, ә билеттарын 7 сентябрҙә төшкә ҡарай ғына теркәгән. Һәм... , уңыш, төшкө отошта уҡ еңгән. – Уйын барышын тура эфир аша күҙәттек һәм билетыбыҙ отҡанын шунда уҡ белдек. Ойоштороусыларҙың шылтыратыуы көтөлмәгән хәл булманы. Ныҡ ҡыуандыҡ әлбиттә, бер ҡасан да отҡаным юҡ ине. Колонкаға балалар айырыуса ҡыуанды, “Рәхмәт”те ойоштороусыларға рәхмәт, – тине ул. Саҡмағош районынан килгән Низаевтар ғаиләһе “Лукошко” магазинына сертификат отҡан. Районда был магазин булмағас, улар бөгөн үк Өфөләгеһенә инеп, уның менән файҙаланмаҡсы. – Һайлауға барыуҙы үҙемдең бурыс тип иҫәпләйем һәм ғүмер буйы йөрөйбөҙ, ә “Рәхмәт” акцияһын иғлан иткәс, унда барыу ҡыҙыҡ та була башланы. Ғаиләбеҙ ҙур: балалар, олатай-өләсәйҙәр бар, шуға күрә туғыҙ билет алдыҡ һәм теркәнек. “Оттоғоҙ” тип шылтыратҡас шунда уҡ ышандым, ҡасан да булһа бәхет йылмайырға тейеш тә инде! – ти Азамат, Гүзәл һәм улдары Булат Низаевтар. Бүләк уйнатыу артабан дауам итә. Билеттарығыҙҙы теркәп өлөгөрөгөҙ. Айрат Нурмөхәмәтов фотолары.