Майҙаны 743,5 квадрат метрлыҡ заманса бина республика Янғын-ҡотҡарыу көстәрен үҫтереү стратегияһы сиктәрендә төҙөлгән. Республика бюджетынан был маҡсатта 105,3 миллион һум йүнәлтелгән. Янғын һүндереүселәр быға тиклем ваҡытлыса бинала дежурлыҡ алып барған. Төбәк етәксеһе яңы янғын депоһы инфраструктураһы менән танышты һәм Башҡортостандың дәүләт наградаларын тапшырҙы. – Бөгөн ысын мәғәнәһендә күңелле ваҡиға. Бер ни тиклем ваҡыт элек беҙ ауыл халҡы, яҡташтарыбыҙ менән бында яҡын-тирәләге тораҡ пункттарҙың, яҡынса 5 мең кешенең, янғын хәүефһеҙлеген тәьмин итәсәк депо төҙөү тураһында килештек. Быйыл беҙ уны төҙөнөк, һәм, миңә ҡалһа, яҡшы килеп сыҡты, – тип һыҙыҡ өҫтөнә алды республика Башлығы Радий Хәбиров. – Бөгөн тәү сиратта төбәк Ғәҙәттән тыш хәлдәр буйынса дәүләт комитетының ошо йылдар дауамында үҙ бурыстарын үтәгән хеҙмәткәрҙәренә рәхмәт белдерәм. Улар янғындарҙы һүндереү, ғәҙәттән тыш хәлдәрҙе бөтөрөү кеүек бурыстарын башҡарҙылар, дөйөм алғанда Һайран ауылы һәм Ишембай районы өсөн терәк булдылар. Һеҙҙең хеҙмәтегеҙҙе республикала бик юғары баһалайбыҙ. Һеҙ гуманитар ылауҙарҙы ла оҙатаһығыҙ – бының өсөн ҙур рәхмәт! Башҡортостан Башлығы Радий Хәбиров яҡташтарына йылы сәләмләү һүҙҙәре менән мөрәжәғәт итте. – Һеҙҙе үҙебеҙҙең Һайран ауылында күреүемә бик шатмын. Уртаҡ Ватаныбыҙ, ошо матур төбәктең сәскә атыуы өсөн һәр саҡ борсолам, – тине төбәк етәксеһе Радий Хәбиров. – Бөгөн тыуған ерем менән танышыу өсөн минең менән бергә республика Хөкүмәте ағзалары ла килде. Барығыҙға ла тыныслыҡ, изгелек һәм именлек теләйем. Ихлас ҡабул итеүегеҙ өсөн рәхмәт! Төбәтең Ғәҙәттән тыш хәлдәр буйынса дәүләт комитеты рәйесе Кирилл Первов белдереүенсә, депоның яңы бер ҡатлы бинаһында ҡарауыл хеҙмәте, янғын һүндереү техникаһы һәм техник хеҙмәтләндереү гаражы, уҡыу һәм административ кабинеттар өсөн биналар ҡаралған. Бынан тыш, объект биләмәһендә уҡыу башняһы, шулай уҡ спорт майҙансығы һәм хоккей ҡумтаһы бар, улар урындағы халыҡ өсөн асыҡ. Шуны билдәләп үтергә кәрәк: Һайран ауылында профессиональ янғын һүндереү подразделениеһы тәүге тапҡыр 2020 йылда асылды. Ул саҡта подразделениеға Рәсәйҙә етештерелгән ике яңы янғын һүндереү автоцистернаһы тапшырылған. Частың яуаплылыҡ зонаһына барлығы биш меңдән ашыу кеше йәшәгән 12 тораҡ пункт, шулай уҡ 37 социаль әһәмиәттәге объект инә. Депола 15 белгес эшләйәсәк. *** Ишембай районына эш сәфәре һуңында Башҡортостан Башлығы Радий Хәбиров Һайран ауылы халҡы менән аралашты. Ауыл халҡы төбәк етәксеһенә кәрәкле инфраструктура булдырған өсөн рәхмәт белдерҙе. Улар үҙәкләштерелгән һыу менән тәьмин итеүҙе һәм газлаштырыуҙы, шулай уҡ яңы фельдшер-акушерлыҡ пункты төҙөүҙе айырым билдәләне. Журналистар менән әңгәмәлә Башҡортостан Башлығы Радий Хәбиров Һайран ауылында янғын һүндереү часын асыуҙың мөһимлеген һыҙыҡ өҫтөнә алды. – Ул дөйөм алғанда 5,5 мең кеше йәшәгән тораҡ пункттарҙы хеҙмәтләндерә. Был урманға терәлеп торған район, унда урман янғындары хәүефе юғары, айырыуса йәй эҫе булғанда, – тип һыҙыҡ өҫтөнә алды республика етәксеһе Радий Хәбиров. – Шуға күрә, янғын хәүефһеҙлеген тейешле кимәлен тәьмин итеү өсөн, янғын һүндереү часын маҡсатҡа ярашлы ошонда урынлаштырҙыҡ. Янғын һүндереү депоһы белгестәре юл-транспорт ваҡиғаларында һәм башҡа ғәҙәттән тыш хәлдәрҙә лә ярҙам күрһәтә, тип билдәләне төбәк етәксеһе. – Бында яҡшы коллектив тупланған. Егеттәр бик мөһим, лайыҡлы һәм хөрмәтле эш башҡара, – тине Башҡортостан Башлығы Радий Хәбиров. Фото: glavarb.ru