“Алға” уңыштары менән һөйөндөрә

24 августа Ишембайҙа Башҡортостан Башлығы Радий Хәбиров «Алға» махсус иҡтисади зонаһының Күҙәтеү советы ултырышын үткәрҙе. Көн тәртибенә махсус иҡтисади зонаның резиденттары тормошҡа ашырған инвестиция проекттары сиктәрендәге көнүҙәк мәсьәләләр ҡуйылды. Ултырыш барышында ҡатнашыусылар айырым иҡтисади зона майҙансыҡтарын үҫтереү, ғәмәлдәге предприятиеларҙың эше, яңы производстволар булдырыу планы, шулай уҡ уларҙы сеймал һәм хеҙмәт ресурстары менән тәьмин итеү тураһында фекер алышты. – Бөгөн беҙ «Алға» махсус иҡтисади зонаһы Күҙәтеү советының бишенсе ултырышын үткәрәбеҙ. Ошо осорҙа ул уңышлы майҙансыҡҡа әйләнде, Ишембай районы иҡтисады, шулай уҡ Стәрлетамаҡ, Салауат һәм Ишембай агломерацияһы үҫешенә етди импульс бирҙе. Айырым иҡтисади зоналарҙың инвестиция йәлеп итеүсәнлеге милли рейтингында «Алға» ике тапҡыр илдә иң динамик үҫешкән тип танылды. Ә уҙған йыл йомғаҡтары буйынса ул «Импортты алмаштырыу» номинацияһында еңеүсе булды, – тине төбәк етәксеһе Радий Хәбиров. – Хәҙер «Алға»ла 22 резидент бар. Уларҙың бишәүһе үҙ производстволарын асты, тағы ла дүртәүһе – төҙөлөш этабында. Инвесторҙар 7,5 миллиард һум аҡса һалған, 950 эш урыны булдырған. *** Былтыр Рәсәй Хөкүмәте «Өфө» индустриаль паркын «Алға» махсус иҡтисади зонаһы составына индереүҙе хупланы, тип иҫкә төшөрҙө Башҡортостан Башлығы. Шул уҡ ваҡытта республикала махсус иҡтисади зона биләмәһен артабан үҫтереү планлаштырыла. – Әле Өфө районында дөйөм майҙаны 106 гектар булған яңы ер участкаларын «Алға» составына индереүгә әҙерләйбеҙ. Тейешле ғариза Рәсәйҙең Иҡтисади үҫеш министрлығына ебәрелде лә инде. Башҡортостан Хөкүмәте был мәсьәләне контролдә тоторға тейеш, – тине төбәк етәксеһе Радий Хәбиров. Республика Башлығы шулай уҡ «Алға»ның барлыҡ майҙансыҡтарында инженер инфраструктураһын төҙөү һәм булдырылған производстволар өсөн кадрҙарҙы ваҡытында әҙерләүгә булышлыҡ итеү буйынса етди эш кәрәклегенә иғтибар итте. *** Ултырышта «Алға» махсус иҡтисади зонаһын үҫтереүҙең төп йүнәлештәре тураһында вице-премьер – Башҡортостандың сәнәғәт, энергетика һәм инновациялар министры Александр Шельдяев хәбәр итте. Башҡортостан Үҫеш корпорацияһы – «Алға» махсус иҡтисади зонаһының идара итеүсе компанияһының генераль директоры Наил Ғәббәсов иҡтисади зона биләмәһендә инженер объекттарын төҙөү барышына ентекләп туҡталды. Инженер объекттары – «Алға» резиденттарының үҙ проекттарын тормошҡа ашыра башлауы өсөн төп фактор, тип һыҙыҡ өҫтөнә алды Башҡортостан Башлығы. – Инфраструктура – инвесторҙар өсөн төп мәсьәлә. Был производстволар төҙөү һәм үҫтереүҙең мөһим шарты. Майҙансыҡтарҙы барлыҡ коммуникациялар менән тәьмин итеү мәсьәләһен тәү сиратта хәл итергә кәрәк, – тине төбәк етәксеһе Радий Хәбиров. Республиканың ғаилә, хеҙмәт һәм халыҡты социаль яҡлау министрының беренсе урынбаҫары Юрий Мельников «Алға» махсус иҡтисади зонаһы резиденттары менән хеҙмәт ресурстарын әҙерләү йәһәтенән үҙ-ара хеҙмәттәшлек тураһында сығыш яһаны. Республика етәксеһе Радий Хәбиров билдәләүенсә, «Алға» махсус иҡтисади зонаһының үҫеш темптары төбәк буйынса уртаса күрһәткестәрҙән юғарыраҡ. Шуға бәйле Стәрлетамаҡ, Салауат һәм Ишембай профессиональ колледждарының талап ителгән белгестәр әҙерләү буйынса потенциалын мөмкин тиклем файҙаланыу бик мөһим. *** Күҙәтеү советы ултырышында «Алға» махсус иҡтисади зонаһы резиденттары етәкселәре етештереү ҡеүәттәрен үҫтереү этаптары хаҡында белдерҙе. Ултырышта шулай уҡ предприятиеларҙы сеймал менән тәьмин итеү, яңы хеҙмәткәрҙәр йәлеп итеү менән бәйле мәсьәләләр, «Алға» махсус иҡтисади зонаһының потенциаль резиденттары проекттары ла тикшерелде. Ултырыш һуңында төбәк етәксеһе «Алға» махсус иҡтисади зонаһы резиденттарына берлектәге эше өсөн рәхмәт белдерҙе һәм, Күҙәтеү советының барлыҡ йөкләмәләре йомғаҡлау протоколында сағылдырыласаҡ, тип билдәләне. – «Алға» – Башҡортостандың мөһим иҡтисади проекты. Төбәктең идара итеү командаһына ышаныуығыҙ һәм беҙгә эшкә килеүегеҙ өсөн рәхмәт. Республика үҙ яғынан махсус иҡтисади зонаны артабан үҫтереү һәм проекттарығыҙға ярҙам итеү буйынса ҡабул ителгән барлыҡ йөкләмәләрҙе үтәйәсәк, – тип йомғаҡ яһаны Башҡортостан Башлығы Радий Хәбиров. Фото: glavarb.ru