Йома төн менән баш ҡалала үлемесле авария теркәлде. Дим биҫтәһендә булған юл-транспорт фажиғәһендә бер кеше урында йән бирҙе, икенсеһе бер нисә сәғәт үткәс дауаханала үлде. Мәғлүмәттәр буйынса, Range Rover машинаһы "ВАЗ-2112" машинаһына килеп бәрелә. Ватан автомобилендә ултырған пассажир хәүефһеҙлек ҡайышын эләктермәгән булған. Ул башы менән ныҡ бәрелә һәм тәҙрә аша сығып оса. Алған йәрәхәттәренән, табиптар ярҙам итеүенә ҡарамаҫтан, ул урында йән бирә. Ул 37 йәшлек Руслан исемле кеше булып сыға. Ни бары бер ай элек, 1 августа ул тыуған көнөн билдәләгән. Уның ҡатыны һәм ике бәлиғ булмаған балаһы ҡалған. Таныштары әйтеүенсә, ул яҡшы кеше булған, балаларын яратҡан һәм ғаиләһе өсөн тырышҡан. Ғүмере буйы автослесарь булып эшләгән. Ҡыҙына ни бары өс йәш, ә улы 10-сы класҡа барырға йөрөгән. Ҡатыны иренең юҡлығына ышана алмай, был ҡайғыны бик ауыр кисерә. "ВАЗ-2112" автомобиле рулендә 21 йәшлек Владислав исемле егет ултырған. Ул таксист булып эшләгән. Бәрелеш ваҡытында башы менән рулгә һуғылған һәм уның баш һөйәге һынған. Уны дауаханаға алып баралар. Тәүҙә торорға маташҡан егет йығыла һәм башҡаса тора алмай. Дауаханала комаға китә һәм аҙаҡ вафат була. Уның ата-әсәһе һәм һөйгән ҡыҙы ҡалған. Владты белгән бөтә кеше лә аварияла ул ғәйепле түгел ти. Ул юл хәрәкәте ҡағиҙәләрен боҙмаған һәм ипле йөрөгән. Range Rover руле артында кем ултырғаны аныҡ ҡына билдәле түгел. Яҡынса унда 30 йәштәр тирәһендәге ир менән ҡатын ултырған. Шаһиттар һүҙҙәренсә, рулдә ҡатын кеше булған. Уны полиция тикшергән һәм эсмәгән булғанын асыҡлаған. Әлегә аварияла кемдең ғәйепле булыуы билдәле түгел. Полиция ныҡлы тикшереү үткәрә. Фото: "КП-Өфө".