"Аяғыма үксә тибенгеһе (тауыҡ тырнағы ла тиҙәр) сығып ыҙалата. Кискелеккә шул тиклем ныҡ һыҙлай, оҙаҡ атлап йөрөһәм дә ауырта. Мазь-кремдар ауыртыуҙы ғына баҫа, ә тотош ҡотолоп булмай. Халыҡ медицинаһында ниндәйерәк дауалау алымдары бар икән?" тип яҙҙы Мәҙинә М.. Уның үтенесенә яуап итеп, бына ошондай дауалау алымдары тәҡдим иттеләр. Гөлзиә Баймырҙина: "Ҡыҙҙар, мин шпораны былай дауаланым: сей бәрәңгене йоҡа ғына итеп турарға, өҫтөнә – әҙерәк бал, бал өҫтөнә ике аспирин таблеткаһын иҙеп һалырға. Ошоно ауыртҡан урынға һалып, өҫтөнән полиэтилен ҡапсыҡ һәм йылы ойоҡбаш кейергә. Мин төнгөлөккә кейеп ятып, икенсе көн төшкә тиклем сисмәнем. Шунан йыуып, аяҡ өсөн тәғәйен крем һөрттөм. Ике-өс тапҡыр эшләгәндән һуң бөттө. Файҙаһы тейһен!" Мәрйәм: "Үксә тибенгеһе сыҡҡас, аяғымдың шул урынына малдың үтен һөрттөм. Һыйыр, һарыҡ малының үте яҡшыраҡ, әммә булмаһа, ҡош-ҡорттоҡо ла бара. Ауылда һуғым мәле ине, күрше-тирәнән дә алып туңдырып, һуңынан ҡулландым. Үт күп булһа, сөм һауытҡа һалып, үксәне тығып ултырырға ла мөмкин. Шулай уҡ үксә менән ҡаты әйбер, мәҫәлән, шешә, йомро таяҡ әйләндереү ҙә һөҙөмтә бирә. Шифаһын күрегеҙ!" Н. Алтынбаева: “Мин үксә типкеһенән бына нисек ҡотолдом. Ниндәй эҫелеккә түҙә алам, шундай эҫе һыуҙа аяҡтарымды 20 минут самаһы тоттом. Унан ҡоротоп, ауыртҡан ергә йод һөрттөм. Йылы ойоҡ кейеп, унан полиэтилен урап, тағы бер ҡат йылы ойоҡ кейҙем. Төн үткәс, сисеп, аяҡҡа крем һөртәһең. Бына шулай 16 көн ҡабатланым, бер нимә лә ҡалманы. Әгәр кемгәлер ярҙам итһә, шатмын”. Ф. Ғәлина: “Был мәшәҡәттән ҡотолоу өсөн ябай ғына рецепт тәҡдим итәм: бер балғалаҡ балға бер балғалаҡ йод һалып, яҡшы итеп болғарға. Ошо ҡатнашманы аяҡтың ауыртҡан өлөшөнә һеңдергәнесе ышҡып һөртөргә. Аяҡҡа кизе мамыҡ ойоҡ кейеп йоҡларға. Иртәнсәк аяҡты яҡшы итеп йыуырға. Миңә ике тапҡыр ҡуланыу ҙа етте”. Был күренеш, ғәҙәттә, 40 йәштән оло кешеләрҙә күҙәтелә. Әйткәндәй, ҡатын-ҡыҙҙарҙа үксә тибенгеһе ир-егеттәргә ҡарағанда күпкә йышыраҡ осрай. Уның төп сәбәпселәре – артыҡ тән ауырлығы, артрит, яҫы табанлылыҡ. Шулай уҡ спортсылар араһында ла был сиргә тарыу хәүефе ҙур. Мәғлүмәттәр таныштырыу маҡсатында бирелде. Сирләгән осраҡта һәм халыҡ медицинаһы алымдарын ҡулланыр алдынан табип менән кәңәшләшеү мотлаҡ! Фото: medicalcase