Улдарығыҙ өсөн ҙур рәхмәт

24 августа Ишембайҙа Башҡортостан Башлығы Радий Хәбиров махсус хәрби операцияла һәләк булған Айҙар Хисмәтуллин, Юлай Шәрәфетдинов, Фидан Шафиҡов, Самат Насыров, Руслан Байтимеров, Эдуард Тихонов, Вәкил Фәтҡуллин, Тәлғәт Кинйәбузовтарҙың ғаиләләре менән осрашты. Төбәк етәксеһе һәләк булған хәрбиҙәрҙең ғаиләләренә ҡайғы уртаҡлашыуын белдерҙе һәм Шайморатов генерал ордендары тапшырҙы. Яугирҙар был наградаларға хәрби бурыстарын үтәгәндә батырлыҡ һәм ҡаһарманлыҡ күрһәткәндәре өсөн лайыҡ булды. – Яҡташтарыбыҙ үҙ ғүмерҙәрен тыуған илебеҙ өсөн ҡорбан итте, һәр береһе үҙ бурысын аҙағына тиклем үтәне. Ысын геройҙар, һәм уртаҡ бурысыбыҙ – улар хаҡындағы хәтерҙе ҡәҙерләп һаҡлау, – тине республика Башлығы Радий Хәбиров. – Һеҙ ысын ир-егеттәр, илһөйәрҙәр, Ватан һаҡсылары тәрбиәләгәнһегеҙ. Улдарығыҙ өсөн ҙур рәхмәт. Беҙ барыбыҙ ҙа улар хаҡында онотмаҫҡа, исемдәрен мәңгеләштерергә, ата-әсәләренә, ғаиләләренә, балаларына иғтибарлы булырға һәм даими хәстәрлек күрһәтергә тейешбеҙ. Башҡортостан Башлығы шулай уҡ Республика кардиология үҙәгендә махсус хәрби операцияла һәләк булғандарҙың ата-әсәләре өсөн һауыҡтырыу һәм реабилитациялау программаһы булдырылыуын иҫтәренә төшөрҙө. – Һеҙгә сәләмәтлегегеҙҙе һаҡларға кәрәк. Һәләк булған егеттәребеҙҙең балаларын беҙ тотош республика менән тәрбиәләрбеҙ, һеҙҙең хаҡта ла хәстәрлек күререҙ. Муниципалитет башлыҡтарының төп бурысы – килеп тыуған барлыҡ мәсьәләләрҙе хәл итеүҙә ярҙам күрһәтеү, – тине төбәк етәксеһе Радий Хәбиров. Өфөлә үҙәк майҙандарҙың береһендә махсус хәрби операцияла һәләк булғандар иҫтәлегенә мемориал төҙөргә ниәтләйбеҙ, тип билдәләне республика Башлығы. Һәр муниципалитеттың да үҙ хәтер аллеялары һәм һәйкәлдәре барлыҡҡа киләсәк. Осрашыу барышында төбәк Башлығы һәләк булған хәрби хеҙмәткәрҙәрҙең ата-әсәләренең республика шифаханаларында дауаланыуға, реабилитация курстарына, шулай уҡ махсус хәрби операцияла ҡатнашыусыларҙың балаларын юғары уҡыу йорттарында уҡытыуға бәйле һорауҙарына яуап бирҙе. – Ҡулдарына ҡорал тотоп һәм ғүмерҙәрен ҡурҡыныс аҫтына ҡуйып, махсус хәрби операция биләмәһендә алышыусыларҙың ғаиләләре мәсьәләләрендә формаллек күрһәтергә ярамай, тип һәр ваҡыт әйтәм. Күңел һәм йөрәк йылыһы менән ҡарарға кәрәк, – тине Башҡортостан Башлығы.