“Торлаҡ һәм ҡала мөхите» милли проектын тормошҡа ашырыу буйынса Ишембай ҡалаһы биләмәһендә 2023-2024 йылдарҙа “Ишембай ҡалаһы Йөрәге – Үҙәк паркты тергеҙеү” Бөтә Рәсәй бәләкәй ҡалалар һәм тарихи ауылдар конкурсы еңеүсеһе проекты һәм “Уңайлы ҡала мөхитен булдырыу” федераль проекты тормошҡа ашырылды. Һүҙ ҡала халҡының төп ял итеү урыны булған А.М. Матросов исемендәге мәҙәниәт һәм ял паркы тураһында бара. Паркка 1946 йылда ҡала йәштәр паркы булараҡ нигеҙ һалына. 2000 - 2015 йылдарҙа фонтан өлөшләтә төҙөкләндерелә, аттракциондар, балалар ҡорамалдары алмаштырыла. Ә 2022 йылда Бөтә Рәсәй бәләкәй ҡалалар һәм тарихи тораҡ пункттар конкурсында еңеү һөҙөмтәһендә “Уңайлы ҡала мөхитен булдырыу” программаһы проектының конкурс объектын синхронлаштырыу тураһында ҡарар ҡабул ителә. 2023 йылда 163 миллион һумлыҡ конкурс объекты (эштәре) ғәмәлгә ашырылған, шуның 95 миллион һумы – Рәсәй бюджеты, ә 50 миллион һумы – республика ҡаҙнаһынан. Төҙөкләндереү сиктәрендә йәйәүлеләр юлдарын төҙөкләндереү буйынса ҙур эш башҡарылған, асфальт түшәлгән, перголалар ҡуйылған, резина япмалы балалар майҙансығы, келәмле спорт майҙансығы, скейт майҙансығы йыһазландырылған, яҡтыртыу таяуҙары, яҡтыртҡыстар, видеокүҙәтеү монтажланған. Программа сиктәрендә үҙәк мәҙәниәт һәм ял паркының дүрт объекты төҙөкләндерелгән. 2024 йылда иһә паркты төҙөкләндереүҙең икенсе этабы тормошҡа ашырыла, проект суммаһы – 42 миллион һум. Ошо йәһәттән дүрт объект реконструкциялана: өс фонтан, сәхнә төҙөлә, сәхнә тирәләй амфитеатр менән майҙансыҡ булдырыла, йәйәү йөрөү юлдары эшләнелә. Был этапта һүтеү эштәре башҡарыла, япмалар, яҡтыртыу, йәшелләндереү һәм башҡа ҡоролмалар урынлаштырыла. Шулай уҡ әйбер һаҡлау өсөн павильон ҡуйылған, унда кейенергә бүлмә, бәҙрәф, сервер, хужалыҡ бинаһы бар. Төп аллея ла төҙөкләндерелә, япмалар алмаштырыла, ял итеү урындары ойошторола, променад буйлап эскәмйәләр ҡуйыла, плитәләр түшәлә, яҡтыртыу ҡорамалдары өҫтәлә, аллея өҫтөндә яҡтыртҡыс аркалар урынлаштырыла. Парктағы төп фонтан территорияһы төҙөкләндерелә, тротуар плитәһе алмаштырыла, фонтан тирәләй ял итеү өсөн урындар ойошторола. – Был Ишембайҙар өсөн иң яҡын урындарҙың береһе, бында ғаиләләр балалары менән килә, йәштәрҙе тартып тороу урыны ла булып тора. Артабан да республика парктарын яңыртыуҙы дауам итәсәкбеҙ! – тип белдерҙе Башҡортостан Башлығы Радий Хәбиров парктағы үҙгәрештәрҙе ҡараған мәлдә. Паркты киләсәктә тағы ла киңерәк яңыртырға һәм йыһазландырырға мөмкинселек бар. Әлеге проектты тормошҡа ашырыу республикала 2019-2024 йылдарҙа йәмғиәт урындарын төҙөкләндереү эштәренең береһе булып тора. Автор фотолары.