Башҡортостан Башлығы Радий Хәбиров «Көҙ романтикаһы» икенсе классик музыка фестивалендә булды

Быйыл классик музыка сараһы өс көн дауамында – 22 августан 24-енә тиклем бара. Шулай итеп, концерт программаһының тәүге көнөндә 24,7 мең кеше булды. Тантана ҡунаҡтары алдында Башҡортостандың халыҡ артисы Дмитрий Крюков етәкселегендә Башҡортостан дәүләт академия симфоник оркестры, Рәсәйҙең һәм Башҡортостандың халыҡ артисы Денис Мацуев, шулай уҡ Рәсәйҙең атҡаҙанған, Башҡортостандың халыҡ артистары – ағалы-ҡустылы Илдар һәм Асҡар Абдразаҡовтар сығыш яһаны. Фестивалдең икенсе көнө программаһында – Башҡортостандың халыҡ артисы Дмитрий Крюков, опера йырсыһы, Үзбәкстандың һәм Башҡортостандың халыҡ артисы Женисбек Пиязов һәм иң танылған кларнетсыларҙың береһе – Башҡортостандың халыҡ артисы Артур Нәзиуллин башҡарыуында әҫәрҙәр. Республика Башлығы Радий Хәбиров артистарҙы һәм ҡунаҡтарҙы сәләмләне һәм Башҡортостандың дәүләт наградаларын тапшырҙы. – Икенсе йыл рәттән Совет майҙанында «Көҙ романтикаһы» фестивален үткәрәбеҙ. Был майҙан үҙ тарихында күпте күргән. 1942 йылдың ҡышында бында 112-се Башҡорт кавалерия дивизияһының хәрби байрағын тапшыралар һәм ир-егеттәрҙе фронтҡа оҙаталар. Хәрби хеҙмәткәрҙәребеҙ бында махсус хәрби операциянан ҡайта, – тине Радий Хәбиров. – Үзбәкстан Республикаһы вәкилдәренә, яҡын дуҫтарыбыҙға айырым рәхмәт һүҙҙәрен еткерәм. Һеҙгә хөрмәтегеҙ һәм иҫ киткес бүләк – Ташкенттан һәм Ҡостанайҙан бер төркөм йәш артистарҙы алып килгән иҫ киткес артист Женисбек Пиязовҡа ҙур рәхмәт. Төбәк етәксеһе фестивалдең тәүге көнөндә сығыш яһаған артистарға ла рәхмәт әйтте. – Кисә был сәхнәлә илебеҙҙең, республикабыҙҙың һәм донъяның билдәле артистары – ағалы-ҡустылы Илдар һәм Асҡар Абдразаҡовтар, Денис Мацуев сығыш яһаны. Иҫ киткес Дәүләт академия симфоник оркестры һәм маэстро Дмитрий Крюковҡа һәм Артур Нәзиуллинға ҙур рәхмәт, – тине төбәк етәксеһе Радий Хәбиров. – Ошо еңел булмаған осорҙа бында романтик классик музыка яңғырай, сөнки беҙҙең тормошта иң мөһиме – мөхәббәт, ғаилә, Ватанға һөйөү, бер-береңде ихтирам итеү һәм иң яҡшы фекерҙәр. Яҡынлашып килгән байрам менән! Бәхетле, сәләмәт булығыҙ! Иртәгә «Көҙ романтикаһы» классик музыка фестивален ябыу тантанаһында Башҡортостандың халыҡ артисы Дмитрий Крюков етәкселегендә беренсе тапҡыр Совет майҙанында Евгений Светланов исемендәге Рәсәй дәүләт академия симфоник оркестры сығыш яһаясаҡ. Фото: БР Мәҙәниәт министрлығының матбуғат хеҙмәте.