Тантаналы сара Евразия ғилми-белем биреү үҙәгенең вуз-ара студенттар кампусы майҙансығында уҙҙы. Унда республика ғилми-мәғариф үҙәгенең идара итеү компанияһы, Өфө фән һәм технологиялар университеты, Рәсәй Фәндәр академияһы Өфө тикшеренеү үҙәгенең Нефть химияһы һәм катализ институты вәкилдәре ҡатнашты. – Бөгөн Башҡортостанда фәнни-популяр туризмды үҫтереү сиктәрендә өсөнсө маршрутты ғәмәлгә индерәбеҙ. Турҙарҙың һәр береһе үҙенсәлекле. Һеҙ киләсәктә ниндәй һөнәр һайларға кәрәклеген белһен өсөн университеттарҙың ҡаҙаныштарын күрһәтәбеҙ. Проектты Башҡортостан Башлығы булышлығында тормошҡа ашырабыҙ, – тине ҡатнашыусыларға Башҡортостандың фәнни-белем биреү үҙәге идара итеү компанияһы директоры Наталия Латипова. Өфө уҡыусылары һәм студенттары химия йүнәлешенә арналған турҙы тәүгеләрҙән булып үтте. Балалар Өфө фән һәм технологиялар университеты, Өфө дәүләт нефть техник университеты һәм Федераль тикшеренеү үҙәге институты лабораторияларында булды. «Дмитрий Менделеев. Өфө – Рәсәйҙең химик баш ҡалаһы» – Евразия ғилми-белем биреү үҙәге ғалимдары әҙерләгән туғыҙ ғилми-популяр маршруттың береһе. – Әҙерләнгән маршруттар – Евразия ғилми-белем биреү үҙәгендә ҡатнашыусыларҙың уртаҡ эш һөҙөмтәһе ул. Уларҙы ойоштороу өҫтөндә төрлө ғилми-тикшеренеү һәм белем биреү ойошмалары ғалимдары эшләне. Республикабыҙҙың ҡаҙаныштарын күрһәтеү мөмкинлеге булыуы менән ғорурланабыҙ, – тине Өфө фән һәм технологиялар университетың стратегик үҫеш проекты етәксеһе, Башҡортостандың ЮНЕСКО эштәре буйынса комитетының башҡарма директоры Рената Лоҡманова. Әҙерләнгән турҙар Рәсәй Президенты ҡарамағындағы Фән һәм мәғариф өлкәләрендә йәштәр эштәре буйынса координация советы экспертизаһын уңышлы үтте һәм Рәсәйҙең фәнни-популяр маршруттары исемлегенә инде. Яңы туристик маршруттарҙы мәктәп уҡыусыһынан алып әйҙәүсе ғалимға тиклем, йәғни теләгән һәр кем үтә ала. Экскурсияларға сайтта https://turizm.nocrb.ru/ яҙылырға мөмкин. Белешмә: Евразия ғилми-белем биреү үҙәгенең вуз-ара студенттар кампусын төҙөү Рәсәй Президенты Владимир Путин ҡушыуы һәм Рәсәй Мәғариф һәм фән министрлығының «Фән һәм университеттар» милли проектын тормошҡа ашырыу сиктәрендә алып барыла. Өфө кампусы проекты – ул 4,3 мең кешегә иҫәпләнгән торлаҡ биналары, уҡыу-ғилми комплексы, лабораториялар, эшлекле зоналар, магазиндар, скверҙар һәм башҡа уңайлы ҡала мөхите объекттары булған студенттар биләмәһе. Фото: https://pravitelstvorb.ru