ПОДЪЕЗДАРҘЫ РЕМОНТЛАУ Башҡортостанда төрлө йүнәлештәге уй-маҡсаттар уңышлы тормошҡа ашырыла. Планлы эштәрҙең барыһы ла кешеләргә йәшәйештә уңайлыҡтар тыуҙырыуға туранан-тура бәйле. Мәҫәлән, күп фатирлы йорттарҙың подъездарына ғына туҡталайыҡ. Элек, дөрөҫөрәге, 2018 йылға ҡәҙәр улар ватылыу-ҡыйралыу хәленә еткәйне. Радий Хәбиров Башҡортостан Башлығы вазифаһында эшләй башлағас та ошо мәсьәләгә ныҡлы иғтибар итте һәм был юҫыҡта ыңғай яҡҡа үҙгәрештәр күҙәтелде, республика етәкселеге насар хәлдәге подъездарҙы тулыһынса тәртипкә килтереү бурысын ҡуйҙы. Тәртиптең тупһанан башланыуы бер кемгә лә сер түгел. Хәйер, уңған хужа ишек алдын да таҙа тота, йорто ла балҡып ултыра, тупһаһын төҙөк тотоуын телгә алыу артыҡ. Әйткәндәй, Радий Фәрит улы сираттағы сығышында былай тигәйне: – Халыҡ мәнфәғәтен хәстәрләү – өҫтөнлөклө йүнәлештәрҙең береһе, иң мөһиме - һәр кем һәр яҡлап та уңайлыҡтары булған шарттарҙа көн итһен. Әйтәйек, иртәнсәк фатирҙан сыҡтың, ә подъезд йыйыштырылған һәм бөхтә, шәп бит! Был һис кенә лә хыял түгел, ә ысынбарлыҡ. Беҙ күп фатирлы йорттарҙағы подъездарҙы планлы рәүештә тәртипкә килтерәбеҙ. Унда йәшәүселәр эштәр барышын тулыһынса күҙәтеү аҫтына алған, уны ҡабул итеп алғанда ла ҡатнаша. Подрядсы кәмселектәрҙе бөтөрмәй тороп, актҡа ҡул ҡуйылмай, аҡса ла түләнмәй. Ысынында, бындай ыҫпайлыҡты күргәндән һуң кәйеф бермә-бер күтәрелә. Башҡортостанда 2019 йылдан алып күп фатирлы йорттарҙағы подъездарҙы тулыһынса ремонтлау тәңгәлендә программа бойомға ашырыла башланы. Ауылдарҙы төҙөкләндереү булһынмы, ял урындарын күркәмләндереү тиһеңме, подъездарға икенсе һулыш биреүме, матур ҙа, кәрәкле лә башланғыстарҙың бөтәһе лә Башҡортостан Башлығының оло хәстәрлеге һәм ярҙамы менән тормошҡа ашырыла. Күркәмлекте эҙләп йыраҡ барманыҡ. Өҙлөкһөҙ ямғыр яуып тороуға ҡарамаҫтан, Өфө ҡалаһының Дим биҫтәһенә юл тоттоҡ. Билдәле, әҙ генә яуым-төшөм булһа, эргә-тирә шунда уҡ бысраҡҡа күмелә, ә беҙ Дим биҫтәһендә шуның тап киреһен күреп шатландыҡ. Төҙөк юлдар, таҙа асфальт, ялтырап ятҡан тротуарҙар, бөхтә подъезд - шуға асыҡ миҫал. Хәбәр итеүҙәренсә, бер нисә йыл һуҙымында Дим районында һикһән тирәһе йорттағы 300-гә яҡын подъезд ремонтланған, ул киләсәктә лә дауам ителәсәк. Әле генә тәртипкә килтерелгән Дағстан һәм Ухтомский урамдарындағы йорт подъездарын инеп күреү бәхете тәтене. Мәҫәлән, шуларҙың береһендә бына ниндәй күренешкә тап булдыҡ – подъезд ишеген асып ингәс тә балаҫҡа тартым йәймәгә аяҡ баҫтыҡ. Баҫҡыс тотҡостары шул хәтлем уңайлы итеп эшләнгән. Ары атлайбыҙ – һөҙәк, иң мөһиме, таҙа баҫҡыстар беҙҙе ҡаршы алды. Унан инде стеналарға күңелдәрҙе күтәрерлек төрлө һүрәттәр төшөрөлгән, гәзит-журнал йәшниктәре уңайлы итеп эленгән. Ә инде тәҙрә төптәрендәге сәскәләр күҙҙең яуын алырлыҡ. бындай матурлыҡты һөйләп аңлатырлыҡ түгел. – Үҙ ғүмеремдә бер нисә фатир алмаштырҙым, әммә бындай күркәм подъезд менән беренсе тапҡыр осрашам, – тип һөйләй етмеш йәшен үткән Факиһа Ниғмәтйәнова. – Быға тиклем подъездар ҡот осҡос хәлдә ине, унда шикле әҙәмдәр ҙә йыш уралды, һаҫыҡ еҫ тә сыҡты. Хәҙер иһә бөтөнләй башҡаса, әйтерһең дә, үҙеңдең өйөңә килеп инәһең. Фото: асыҡ сығанаҡтарҙан.