Яҙын махсус хәрби операция биләмәһенә гуманитар ярҙам алып барғандан һуң Данис Йыһаншин кисерештәре менән уртаҡлашҡайны. “Махсус хәрби операция темаһы миңә тынғылыҡ бирмәй. Унда егеттәр һәләк булғанда тыныс йәшәй һәм эшләй алмайым. Хәлдән килгәнсе ярҙам итергә тырышам. Ә беҙ нимә эшләй алабыҙ? Минең уйлауымса, хәрбиҙәрҙең көнкүреш тауарҙарына ихтыяжы кәмене, сөнки тәьминәт яҡшы. Шулай уҡ туғандары һәм ирекмәндәр ярҙамында был йүнәлештәге һорауҙар хәл ителә. Хәҙер беҙҙән тәҡдимдәрҙе һәм оҫталыҡты туплауҙы талап иткән ниндәйҙер технологик әйберҙәр ныҡ кәрәк. Унда булғанда үҙенсәлекле әйберҙе – “Анютка” исемле фронт арбаһын күрҙем. Ул, үҙ ғүмерен ҡурҡыныс аҫтына ҡуйып, яралыларҙы һуғыш яланынан эвакуациялаған санитарҙарҙың бурысын еңеләйтә. Хәрби припастар ташыуҙа ярҙамлаша. Шулай уҡ һәләк булған хәрбиҙәрҙе сығарыу өсөн дә кәрәк. Яугирҙәр әйтеүенсә, уларҙың “үҙебеҙҙекеләрҙе ташламайбыҙ” тигән ныҡлы ҡағиҙәһе бар, һәләк булғандарҙың кәүҙәһен һәр ваҡыт алып сығарырға тырышалар, – тип һөйләне. “Анютка”ны әҙерләү өҫтөндә бөтә илдән инженер-волонтерҙар шөғөлләнгән. Хәрбиҙәрҙең һорауы буйынса эшләгәндәр. Бурысы шундай: яралыларҙы эвакуациялау сараһы кәрәк, әммә бөгөн булғандарҙың береһе лә фронтта булған бурыстарға һәм талаптарға тап килмәй. “Буханка” автмобиле туранан-тура позицияларға барып етә алмай, электр һәм ғәҙәти ике тәгәрмәсле арбалар яраҡһыҙ, сөнки яралыларҙы траншеялар һәм миналы яландар араһындағы тар һуҡмаҡтар буйлап эвакуациялауға тура килә. Әгәр киң арба һөйрәп йөрөһәң, йәки боронғоса дүрт-алты кеше яралыны күтәреп ташыһа, уларҙың, беренсенән, минаға баҫыуы ихтимал. Икенсенән, алты кеше һәм яралы – был инде дошман, дрондар һәм башҡалар өсөн һөжүм маҡсаты. – Бына шуға ла “Анютка”ны эшләнгәндәр. Был арбаның сертификаттарын таптым, өлгөһөн алып килдем, күршеләребеҙ – магнитогорскиҙар ярҙам итте. Белоретта “Анютка”ны әҙерләүҙе ойоштороу теләге тынғылыҡ бирмәне. Белорет халҡы араһында алтын ҡуллы һәм дөрөҫ фекер йөрөткән оҫталарҙың күп булыуын беләм, беҙҙә әле генетик хәтер йәшәй – туғандарыбыҙҙың тылда ниндәй тырышлыҡ менән Еңеү яулағанын хәтерләйбеҙ. Шуға күрә беҙ булдыра алырбыҙ, тигән ышаныс бар. Был махсус хәрби операциялағы яҡташтарға файҙалы адреслы ярҙам буласаҡ, тигән ҡарарға килдем. Әлбиттә, әҙерҙе һатып алырға ла мөмкин. Улар баҙарҙа бар. Әммә үҙебеҙҙең бюджеттан сығып, уларҙы үҙебеҙ етештерһәк, күпкә арҙанға төшә, ә беҙҙән фронтҡа ҙур файҙа буласаҡ. Ошоға бәйле процесты камиллаштырыу һәм Белоретта конвейер тибындағы эвакуация арбалары етештереүҙе яйға һалыу идеяһы барлыҡҡа килә. Был белореттарҙың фронтҡа ярҙам итеүгә һәм еңеүгә индергән өлөшө буласаҡ, – ти эшҡыуар. “Анютка”ны етештереү өсөн бина, деталдәр, иретеп йәбештереү материалдары, эшсе ҡулдар һәм тәҡдимдәр талап ителә. Ошо хаҡта эшҡыуар социаль селтәрҙәге сәхифәһендә яҙып, ярҙам һорағас, белореттар уның был тәҡдимен хуплап, был изге башланғысҡа ихлас ҡушыла, аҡса йыя. Урында йыйыу өсөн эшсе ҡулдар ҙа талап ителә. Уларҙы иғлан биреп эҙләйҙәр. Беренсе арбаларҙы Степанов (Белкухня) шәхси преприятиеһы, Сергей Зонов, Вадим Минһажев, Денис Зарипов эшләргә ярҙам итә. Һуңынан Кирилл һәм Анна Петряевтар, уларҙың дуҫтары әүҙем ҡушыла. Урал пружиналар заводы кәрәкле пружиналар бирә. “Крепежный арсенал” магазины тауарҙарға һиҙерлек ташлама яһай. “Урман” магазины һәр ваҡыттағыса әүҙемлек күрһәтә. Халыҡ аҡсалата ярҙам итә – ике айҙа 107 300 һум аҡса йыйыла. Һөҙөмтәлә бөтәһе 28 арба эшләгәндәр, Данис Йыһаншин уларҙы гуманитар ярҙам менән алып барып тапшырған. Әгәр эшсе ҡулдар етһә, тағы ла күберәк алып барырға булыр ине, ти ул. – Белоретта етештерелгән санитар арбаларға фронт һыҙығынан яҡшы баһа алдыҡ. Еңел, һәйбәт хәрәкәт итә, ҡулланыуға уңайлы. Егеттәр тағы ла алып килеүҙе һорай. Ысынлап та, уларға ихтыяж ҙур. Гуманитар йөктө, һәр ваҡыттағыса, үҙемдең машинала алып барҙым. Ә инде беҙҙең бергә булыуыбыҙ, тупланыуыбыҙ миңә ышаныс өҫтәй. Бөтәһенә лә рәхмәт! – ти эшҡыуар. Фотолар Данис Йыһаншиндың социаль селтәрҙәге сәхифәһенән алынды.