Հայաստանում COVID-19-ի դեմ պատվաստումն իրականացվում է միայն Pfizer պատվաստանյութով, Armenia Today-ի թղթակցի հարցին ի պատասխան՝ ասաց Հիվանդությունների վերահսկման և կանխարգելման ազգային կենտրոնի ղեկավար Ստեփան Աթոյանը։
Նա այսպես է մեկնաբանել AstraZeneca պատվաստանյութի դեմ դատական հայցերի և տարբեր երկրներում դրա օգտագործման արգելքի մասին հաղորդագրությունները։
Forbes-ը մայիսի 7-ին գրել էր, որ անգլո-շվեդական AstraZeneca-ն մայիսի 7-ից սկսել է հետ կանչել իր COVID-19 պատվաստանյութը վաճառելու և օգտագործելու լիցենզիաներն ամբողջ աշխարհում՝ կողմնակի ազդեցությունից տուժած մարդկանց հետ դատական գործընթացի ֆոնին:Ընկերությունը դատարանում խոստովանել էր, որ իր պատվաստանյութը կարող է մահացու թրոմբոզ առաջացնել, սակայն «խիստ հազվադեպ»: Ըստ Forbes-ի՝ ընդհանուր առմամբ՝ տուժել է 158 մարդ, և Բրիտանիայի կառավարությունը նրանցից յուրաքանչյուրին վճարել է 150 000 դոլար փոխհատուցում։ AstraZeneca-ն առաջիններից մեկն էր, որ մշակել էր COVID-19-ի իր պատվաստանյութը:
2022թ․ մարտին ՀՀ առողջապահության նախարարությունից հայտնել էին, որ Միացյալ Թագավորության կառավարությունը Հայաստանին է նվիրաբերել AstraZeneca պատվաստանյութի ավելի քան 25 հազար դեղաչափ։ Մայիսի 16-ին ՀՀ առողջապահության նախարարությունից Armenia Today-ին հայտնել էին, որ հանրապետությունում AstraZeneca-ն այլևս չի օգտագործվում։
Նորություններին հետևեք մեր կայքում, ինչպես նաև Telegram-ում և YouTube-ում