Ике аҙнанан 19 йәше тулырға тейеш булған...

Уҙған аҙна аҙағында Стәрлетамаҡта булған аварияла 18 йәшлек ҡыҙҙың ғүмере өҙөлдө тип яҙғайныҡ. Кис менән Mitsubishi Galant автомобиленең 22 йәшлек водителе машинаһына идараны юғалта һәм ҡаршы һыҙатта Renault Logan менән бәрелешә. “КП-Өфө” баҫмаһы был аварияның нисек булғанын һәм һәләк булған ҡыҙҙың кемлеген асыҡлаған. Елизавета Н.-ға 18 генә йәш була. Рулдә ултырған егет алдында килгән машинаны үтеп китәм тип ҡаршы һыҙатҡа сыға һәм унда “Логан”ға барып бәрелә. Көслө бәрелештән һуң машиналар төрлө яҡҡа осоп китә хатта. Артта ултырған Елезавета һәләк була, әхирәте ауыр йәрәхәттәр ала. Шаһиттар һөйләүенсә, Mitsubishi бик ҙур тиҙлек менән китеп барған һәм шуға ул ҡаршы һыҙатҡа сығып, машина килеп сыҡҡас, бер нимә лә эшләп өлгөрмәгән. Аварияны балкондан күреп торған Мария һөйләүенсә, водитель ҡаршы һыҙатҡа сығыр алдынан “поворотник”тарын яндырмаған. Ҡатындың әсәһе кешеләргә тәүге ярҙам күрһәтә белгәс, шунда уҡ авария урынына йүгереп сыға һәм “ашығыс ярҙам” килеп еткәнсе йәрәхәтләнгән кешеләр янында була. – Әсәйем сепрәктәр, һыу алды ла шунда уҡ йүгереп сыҡты. Ул саҡта ҡыҙ әле тере, тик ҡанға батҡан һәм аңһыҙ булған. Ҡулында ниндәйҙер еләктәр менән ҡапсыҡ булған, аңһыҙ булһа ла, шуны ҡулынан төшөрмәгән, ныҡ итеп тотҡан. Машинаның икенсе яғында ир кеше ярҙам иткән, ул пульсын иҫәпләгән. Пульсы бик әкрен булған, – тип иҫләй Мария. Машинаның икенсе пассажиры Алина бәрелештән һуң машинанан сығып осҡан. Әллә тәҙрә аша, әллә асылып киткән ишектән – быны бер кем дә әйтә алмай. Табиптар килеп еткәнсе яҡында булған кешеләр уның менән һөйләшкән һәм аңын юғалтырға бирмәгән. Башынан ҡан килһә лә, ул торорға тырышҡан. Әле ул реанимацияла. Renault Logan водителе иһә саҡ-саҡ машинаһынан сығып, юлдан ситкәрәк киткән һәм ергә ҡолаған. Әйтеүенсә, уның елкәләре ауыртҡан һәм аяҡтарын тоймаған. Янында ултырған пассажиры ла йәрәхәттәр алған, ә артта ултырған пассажирға бер нимә лә булмаған. Һаулыҡ һаҡлау министрлығынан хәбәр итеүҙәренсә, әле аварияла йәрәхәтләнгән бөтә кешеләрҙең дә хәле тотороҡло. Аварияның тағы бер шаһиты Альбина исемле ҡатын үҙе саҡ ҡорбанға әйләнмәй. – Мөғжизә менән генә ҡаршыма килгән Mitsubishi менән бәрелешеүҙән ҡастым. Мин ялтанып ҡалдым, ә “Логан” өлгөрмәне. Әлбиттә, аварияла Mitsubishi водителе Александр ғәйепле, ул ныҡ тиҙ килде һәм ҡаршы һыҙатҡа сыҡты. Уның пассажир ҡыҙы мин барған саҡта иҫән ине, пульсы бар тинеләр. Әммә 5-10 минуттан, табиптар килеп еткәнсе ул йән бирҙе. Аварияла ғәйепле егет үҙен тыныс тотто, полиция менән аралаша ине, тик дөрөҫлөктө йәшерергә тырышты. Имеш, уның алдынан килгән машина ихатаға борола башлаған һәм ул ҡапыл тормозға баҫҡан да, ҡаршы һыҙатҡа барып сыҡҡанмын тине. Тик ул алдай, ул юл киҫелешенән үк ҙур тиҙлектә килә ине, – тигән ул. Ҡайһы бер шаһиттар әйтеүенсә, егет авариянан һуң тәүҙә ҡасҡан, тик күп тә үтмәй кире килгән. Моғайын, ул үҙе лә шок хәлендә булғандыр. Тик кешеләр йәш ҡыҙҙың ғүмерен өҙөүҙә ғәйепле егеткә лайыҡлы яза бирелергә тейеш тип иҫәпләй. – Әле ҡайҙалыр ҡыҙын юғалтҡан әсә илап ултыра бит. Лайыҡлы яза булырға тейеш. 4 августан алып ҡына ла Стәрлетамаҡта өс үлемесле авария булды. Өсөһөндә лә йәп-йәш водителдәр ғәйепле, улар арҡаһында бер ғәйепһеҙ кешеләр һәләк була,– тип өҫтәгән Альбина. “КП-Өфө” баҫмаһы һәләк булған ҡыҙҙың ағаһы менән дә аралашҡан. Андрей әлеге ваҡытта вахтала икән, тик тәүге рейс менән һеңлеһен һуңғы юлға оҙатыр өсөн ҡайтасаҡ. Ул яҡын кешеһенең үлемен ауыр кисерә. – Лиза Стәрлетамаҡта колледжда уҡыны быйыл һуңғы курсҡа барырға тейеш ине. Ул педагогҡа уҡыны, ә каникул ваҡытында ике урында эшләп йөрөнө. Уның юҡлығына ышана алмайым. 5 сентябрҙә уға 19 йәш тулыр ине. Ул сәләмәт тормош рәүеше алып барҙы, киләсәккә ҙур пландар ҡора ине. Водитель уның әхиртенең йөрөгән егете булғанын беләм. Алина уны бергәләп ҡала буйлап йөрөп килергә саҡырған, – тигән ул. Лизаны барыһыла тик яҡшы яҡтан хәтерләй. Беҙ ҙә ҡыҙҙың яҡындарының ауыр ҡайғыһын уртаҡлашабыҙ. Аварияға килгәндә, хоҡуҡ һаҡсылары тикшереү үткәрә. Экспертизалар билдәләнгән. Фото: КП-Өфө.