Башҡортостандың Үрге Йәркәй үҙәк район дауаханаһы автопаркы ике Lada Niva маркалы автомобиленә тулыланды. Улар “Һаулыҡ һаҡлау” милли проектының “Беренсел звеноны яңыртыу” төбәк программаһы ярҙамында килде. Был машиналарҙа табиптар кисектергеһеҙ саҡырыуҙарға сыға, бынан тыш, улар пациенттарҙы дауаханаға алып барыу һәм алыҫ урынлашҡан ауылдарҙа йәшәүселәргә дарыуҙар таратыу өсөн файҙаланыла. Был автомобилдәрҙең характеристикаһы бик киң. Уңайлыҡ өсөн улар кондиционер, алғы ултырғыстарҙы йылытыу менән тәьмин ителгән. Һыуыҡ һауа торошона ҡаршы тороу һәм юлдарҙың күреү мөмкинлеген һаҡлау өсөн тышҡы көҙгөләрҙе йылытыу системаһы бар. Пассажирҙарҙың хәүефһеҙлеге өсөн хәүефһеҙлек мендәрҙәре бар, ә ултырғыстар яһалма күндән эшләнгән, был уларҙы дезинфекция саралары тәьҫиренә тотороҡло итә. – “Һаулыҡ һаҡлауҙың беренсел звеноһын яңыртыу” программаһы сараларын тормошҡа ашырыу ярҙамында табиптар һәм шәфҡәт туташтары өсөн лайыҡлы һәм уңайлы шарттар булдырыла, әлбиттә, был районыбыҙҙың төпкөл ауылдарында йәшәүселәргә медицина ярҙамы алыу мөмкинлеген яҡшыртыуға булышлыҡ итә, –- тип билдәләне Үрге Йәркәй дауаханаһының баш табибы Рәзидә Ғатауллина. 2023 йылда Рәсәйҙә 1,2 меңдән ашыу беренсел звено һаулыҡ һаҡлау объекты төҙөлгән, 1,5 меңдән ашыу объектҡа капиталь ремонт үткәрелгән, 51,9 меңдән күберәк берәмек медицина ҡорамалы һәм 3 меңдән күберәк берәмек автомобиль транспорты һатып алынған. Билдәле булыуынса, “Һаулыҡ һаҡлау” (национальный проект “Здравоохранение”) милли проекты Рәсәй Президенты Владимир Путиндың май указы менән булдырылды. Фото: Һаулыҡ һаҡлау министрлығы.