Бәләбәй - Николаевка - Туймазы - Баҡалы юлында “Хәүефһеҙ сифатлы юлдар” милли проекты буйынса ремонт эштәре барышында юл ситтәрен төҙөкләндереү эштәре алып барыла. Эштәрҙе Кендектамаҡ һәм Собханғол ауылдары янындағы дөйөм 5,6 саҡрымлыҡ ике участкала башҡаралар. Төҙөкләндерелгәндән һуң подряд ойошмаһы юл япмаһына тамғалар төшөрә башлаясаҡ. – Бәләбәй - Николаевка - Туймазы - Баҡалы юлы Башҡортостан Республикаһының терәк селтәренә инә һәм республиканың бер нисә районы тораҡ пункттары өсөн транспорт бәйләнешен тәьмин итә. 2024 йылға 16,1 саҡрым оҙонлоҡтағы япманы яңыртырға ниәтләйбеҙ, - тип һөйләне Башҡортостандың транспорт һәм юл хужалығы министры вазифаһын башҡарыусы Любовь Минакова. 2024 йылда Башҡортостанда милли проект сиктәрендә бөтәһе 60,5 саҡрым терәк юл селтәрен ремонтлау күҙаллана. Эштәр 26 объектта башҡарыласаҡ. Улар район үҙәктәрен Өфө менән бәйләгән трассаларҙа, шулай уҡ әһәмиәтле туристик объекттарға, транспорт һәм логистика узелдарына, ҙур сәнәғәт предприятиеларына йәки кластерҙарға илткән юлдарҙа урынлашҡан. “Хәүефһеҙ сифатлы юлдар” милли проекты сиктәрендә Башҡортостан Республикаһында дөйөм оҙонлоғо 188 саҡрым тәшкил иткән 91 объектта эштәр үтәсәк. Ошо маҡсатҡа 6,6 миллиард һум ҡаралған, шуның 3,3 миллиард һумы - федераль бюджет аҡсаһы. “Хәүефһеҙ сифатлы юлдар” милли проекты (национальный проект "Безопасные качественные дороги") “2030 йылға тиклемге осорға Рәсәй Федерацияһын үҫтереүҙең милли маҡсаттары һәм стратегик бурыстары тураһында” ил Президенты Владимир Путиндың Указы положениеларын үтәү маҡсатында Рәсәйҙең Транспорт министрлығы тарафынан әҙерләнгән. Милли проекттың масштабы бөтә илде солғап ала, унда Рәсәйҙең 84 субъекты ҡатнаша. Фото: Юл һәм транспорт министрлығы.