Башҡортостанда уңайлы ҡала мөхите булған ҡалалар һаны етенән 17-гә тиклем – 33-тән 81 процентҡаса – артты. Башҡортостан Хөкүмәте Премьер-министры Андрей Назаров етәкселегендәге Хөкүмәт кәңәшмәһендә республикалағы ҡалаларҙың ҡала мөхите рейтингы тураһында һөйләшеү булды. Былтырғы һөҙөмтәләргә ҡарағанда, был күрһәткес буйынса төбәк ҡуйылған планды үтәгән. Рәсәйҙең Төҙөлөш һәм торлаҡ-коммуналь хужалыҡ министрлығы баҫтырған мәғлүмәттәргә ҡарағанда, 2023 йыл һөҙөмтәләре буйынса төбәктәрҙә ҡала мөхите сифаты индексы баһаһы һөҙөмтәләренә ярашлы, Башҡортостан илдә 22-се урын биләй. Өфө 16 ҙур, халҡы миллион кеше булған ҡалалар араһында етенсе урынды биләй. Туймазы, Дүртөйлө, Ағиҙел, Баймаҡ, Стәрлетамаҡ, Бәләбәй, Ишембай, Яңауыл, Сибай, Октябрьский, Бөрө, Мәләүез, Салауат, Нефтекама, Учалы һәм Белорет ҡалалары уңайлы мөхит булдырыу үҫеше буйынса ыңғай баһаланды. - Уңайлы ҡала мөхите халыҡ тормошо уңайлылығының һәм хәүефһеҙлегенең интеграль күрһәткесе булып тора. Ул төҙөкләндереү, йәмәғәт транспорты үҫеше, юлдар хәүефһеҙлеге, ҡала хужалығын һанлаштырыу, социаль-хеҙмәтләндереү уңайлылығы өлкәләрендәге 36 индикаторҙы үҙ эсенә ала. Рейтинг күрһәткестәрен яҡшыртыу буйынса барлыҡ күрһәткестәр - муниципалитеттарҙың һәм республика башҡарма власының тармаҡ органдарының даими контролендә, - тип һыҙыҡ өҫтөнә алды Андрей Назаров. Йыл һайын был индекстың үҫеше Рәсәй Президенты Владимир Путиндың май указдарына ярашлы ҡабул ителгән “Торлаҡ һәм ҡала мөхите” милли проектының (национальный проект “Жилье и городская среда”) төп күрһәткестәренең береһе булып тора. Рейтинг алты ҡала киңлеген – торлаҡ, йәшеллек киңлектәрен, ижтимағи-эшлекле инфраструктура, социаль инфраструктура, юлдарҙы һәм дөйөм ҡала киңлектәрен – үҙ эсенә ала. Уларҙың һәр береһе алты критерий – хәүефһеҙлек, уңайлылыҡ, экология, оҡшашлыҡ һәм идара итеүҙең һөҙөмтәлелеге буйынса баһалана. Башҡортостандың торлаҡ һәм коммуналь хужалыҡ министры Ирина Голованова рейтингты булдырған факторҙар тураһында һөйләне. - Яҙ Башҡортостан Башлығы тарафынан республикалағы барлыҡ ҡалаларҙы ла, иң кәмендә 181 балл туплап, уңайлы ҡала мөхите статусын алыу мәсьәләһе ҡуйылғайны. Күрһәткестәргә өлгәшеү өсөн юл карталары раҫланды. Улар муниципалитеттарға дәүләт власы органдары менән үҙ-ара эш итеүҙе талап иткән сараларҙы үтәүҙе күҙаллай, - тип һығымта яһаны Андрей Назаров һәм муниципаль райондар, ҡала округтары хакимиәттәре етәкселектәренә республиканың башҡарма власть органдары менән берлектә ағымдағы йыл тамамланғанға тиклем ҡала мөхите сифатын яҡшыртыу буйынса саралар ҡабул итергә ҡушты. Сығанаҡ, фото: pravitelstvorb.ru/news/24711/