ҠОТЛАЙБЫҘ!

Бөгөн М.Ғафури исемендәге Башҡорт дәүләт академия драма театрының баш режиссеры, Башҡортостандың атҡаҙанған сәнғәт эшмәкәре, С.Юлаев исемендәге дәүләт премияһы лауреаты Айрат Абушахманов алтын юбилейын – 50 йәшен билдәләй. Уны “башдрам”дар коллективтың ижади лидеры тип йөрөтә. Айрат Абушахманов, тыуған Башҡортостанынан тыш, Татарстан, Сыуашстан, Ҡаҙағстан, Омск, Таллин театрҙарында спектаклдәр ҡуйҙы. "Оҙон-оҙаҡ бала саҡ", "Ҡара йөҙҙәр", "Джут", "Бәхет хаҡы", "Һинһеҙ килгән яҙҙар" һәм башҡа спектаклдәрен тамашасылар яратып ҡабул итте. Ул сәхнәләштергән әҫәрҙәр Башҡортостандың профессиональ театр сәнғәтен республикала ғына түгел, Рәсәй, халыҡ-ара театр фестивалдәрендә лә лайыҡлы күрһәтеүгә, танытыуға булышлыҡ итә. Айрат Абушахманов ҡуйған ике спектакль илдең иң юғары театр премияһын яулауға өлгәште. 2014 йылда “Алтын битлек” Рәсәй милли театр премия-фестивалендә “Ҡара йөҙҙәр" спектакленең ҡуйыусы рәссамы А. Нестеров “Костюмдар буйынса иң яҡшы рәссам эше” номинацияһында еңеүсе була, ә 2017 йылда “Зөләйха күҙҙәрен аса” спектакле жюриҙың махсус премияһына лайыҡ тип табыла. Әйткәндәй, Башҡорт дәүләт академия драма театры X Халыҡ-ара театр олимпиадаһында һәм XI MITEM Халыҡ-ара театрҙар фестивалендә Рәсәйҙән берҙән-бер вәкил булды. Тәүгеһендә коллектив Айрат Абушахмановтың “Джут” (“Йот”), икенсеһендә “Ҡара йөҙҙәр” спектакле менән сығыш яһаны. Һуңғы йылдарҙа Айрат Әхтәм улы проекттың художество етәксеһе булараҡ "Ат уйнатып алдан бара..." һәм ҡуйыусы-режиссер булараҡ "Ҡыҙыл паша" спектаклдәре менән бөйөк шәхестәребеҙ – Миңлеғәле Шайморатов менән Кәрим Хәкимовтың исемдәрен халыҡҡа ҡайтарыуға үҙ өлөшөн индерҙе. Республикала беренсе булып беҙҙең театрҙа тап уның башланғысы менән яңы тыуған балалар өсөн "Бэби-театр", "Балам" социаль спектакле, вербатим жанрындағы сәхнә әҫәрҙәре донъя күрҙе. Ә 2024 йыл “ғафури”ҙар өсөн генә түгел, бар театр һөйөүселәр өсөн ифрат иҫтәлекле һәм мөһим булды – Башҡортостандың халыҡ яҙыусыһы Таңсулпан Ғарипованың “Бөйрәкәй” пенталогияһы буйынса спектакль сәхнәләштерелде. Әлбиттә, бындай ҙа ҡатмарлы жанрға йөрьәт итеп тотонған режиссер тап Айрат Абушахманов булды, һәм был берәүҙе лә ғәжәпләндермәне. Спектакль ҙур уңыш ҡаҙанды, башҡорт театрының тарихында иң көслө әҫәрҙәрҙең береһе булып танылды. Ҡыйыу, үҙенсәлекле ижади ҡарашҡа эйә режиссер артабан да театр һөйөүселәрҙе яңы әҫәрҙәре менән ҡыуандырыр, тип өмөтләнәбеҙ. Айрат Әхтәм улын "Башҡортостан" гәзите коллективы, уҡыусыларыбыҙ исеменән ғүмер байрамы менән ҡотлап, ҡоростай ныҡлы һаулыҡ, ғаилә именлеге, илһамлы ижад, яңы ҡаҙаныштар теләйбеҙ!