Тарихи объекттарға яңы һулыш өрөлә

2024 йылда Өфөлә мәҙәни мираҫ объекттарын реставрациялау эштәрен әүҙем дауам итәләр. Баш ҡаланың 450 йыллығына әҙерлек сиктәрендә архитектура ҡомартҡыларына ремонт үткәреүгә 23 рөхсәт бирелде. Башҡортостан Башлығы Радий Хәбиров рәйеслегендә үткән аҙналыҡ оператив кәңәшмәлә республиканың Мәҙәни мираҫ объекттарын дәүләт һаҡлауы буйынса идаралыҡ етәксеһе Салауат Ҡолбахтин ошо хаҡта һөйләне. – Тарихи ҡиммәткә эйә биналарҙың фасадтарын һәм ҡыйыҡтарын яңыртыуға айырым иғтибар бирәбеҙ. Элемтә йорто, Коммерция училищеһы һәм Башпотребсоюз бинаһы кеүек төп объекттарҙа фасадтарҙың штукатур-буяу ҡатламын тергеҙеү эштәрен алып барабыҙ, – тип билдәләне Салауат Ҡолбахтин. Өфөнөң 450 йыллығына әҙерлек сиктәрендә төрлө мәҙәни мираҫ объекттарында эштәр тамамлана. Мәҫәлән, Ленин урамы, 28 адресы буйынса урынлашҡан “Элемтә йорто”нда фасадтарҙың штукатур-буяу ҡатламын тергеҙәләр, ярыҡтарҙы тигеҙләйҙәр, ҡойолмаларҙы ремонтлайҙар. Шулай уҡ Октябрь Революцияһы, Карл Маркс һәм Зәки Вәлиди урамдарындағы тарихи биналарҙы ремонтлайҙар. Бөтә процестар ҙа биналарҙың тарихи тышҡы күренешен һаҡлауҙы тәьмин итеүсе дәүләт күҙәтеүе аҫтында үтә. Өфө үҙәк урамдарын тейешле тәртипкә килтереү буйынса өс йыл дауамында алып барылған эш дауам итәсәк, тип билдәләне Башҡортостан Башлығы Радий Хәбиров. – Баш ҡалабыҙҙың тарихи үҙәгенең тышҡы ҡиәфәте үҙгәреүен күрәбеҙ. Өфөлә үҙәк урамдарҙың тышҡы йөҙөн планға ярашлы яҡшырттылар – тротуар плиткаһын яңырттылар, «Таҙа күк» ҡала проектын ғәмәлгә ашырҙылар, уның сиктәрендә электр кабелдәрен ергә йыйҙылар. Был саралар ҡаланың эстетик йөҙөн үҙгәртә. Бындай эште беҙ һәр ваҡыт башҡарырбыҙ, - тине Радий Хәбиров. Республика Башлығы Өфө Хакимиәтенә һәм төбәктең Финанс министрлығына баш ҡала урамдарының тышҡы йөҙөн артабан яҡшыртыу өсөн саралар планлаштырырға ҡушты. Фото: Башҡортостан Башлығы сайты.