Быйыл миллиондан ашыу кеше диспансерлаштырыу үткән

2024 йылдың тәүге ете айында Башҡортостанда миллиондан ашыу кеше диспансерлаштырыу үткән. Иҫкәртеү тикшереүҙәренә 73 медицина ойошмаһы һәм 30 мобиль медицина бригадаһы йәлеп ителгән. Был хаҡта Башҡортостан Башлығы Радий Хәбиров уҙғарған оператив кәңәшмәлә республиканың һаулыҡ һаҡлау министры Айрат Рәхмәтуллин хәбәр итте. – Диспансер күҙәтеүен эш урындарынан үтеүселәр һаны йыл һайын арта, 2021 йыл менән сағыштырғанда был күрһәткес 41,8 процентҡа күберәк, – тип билдәләне Айрат Рәхмәтуллин. 2024 йылда Башҡортостанда эшләүсе халыҡтың һаулығын яҡшыртыуға йүнәлтелгән бер нисә башланғыс тормошҡа ашырыла. Был өлкәләге яңылыҡтарҙың береһе булып Өфөләге 13-сө ҡала клиник дауаханаһы базаһында «Сәнәғәт медицинаһы үҙәге»н асыу тора. – Үҙәк ҙур сәнәғәт предприятиелары хеҙмәткәрҙәре араһында профилактик медицина тикшереүҙәренең һөҙөмтәлелеген арттырыу өсөн булдырылды, – тип хәбәр итте Айрат Рәхмәтуллин. Сәнәғәт медицинаһы үҙәгенең эше һөҙөмтәлелеген иҫбатлаған да инде: 2024 йылдың ете айында бында 22 меңдән ашыу кеше медицина тикшереүе үткән. Төрлө ауырыуҙарҙың 2 меңдән ашыу осрағы асыҡланған, улар иҫәбендә – ҡан әйләнеше системаһы ауырыуҙары, шәкәр диабеты һәм яман шештәр. Пациенттар диспансер иҫәбенә алынған һәм тейешле дауалау саралары менән тәьмин ителә. Иҫкәртеү сараларын киңәйтеү өсөн алты күсмә медицина комплексы һатып алынған. Улар тикшереүҙәрҙе предприятиеларҙа үткәреү мөмкинлеген бирә, был, үҙ сиратында, медицина хеҙмәттәре менән ҡулланыуҙы уңайлыраҡ һәм тиҙерәк итә. Бынан тыш, Башҡортостанда Хеҙмәтсәндәрҙең һаулығын нығытыу компетенциялары үҙәге булдырылды. Бөгөн 134 корпоратив программа эшләй. Хеҙмәткәрҙәрҙең һаулығын һаҡлау һәм уны яҡшыртыуға йүнәлтелгән бындай корпоратив программаларҙың төп маҡсаты – ауырыуҙарҙы иҫкәртеү, иртә асыҡлау һәм сәләмәт йәшәү рәүешен пропагандалау юлы менән сирҙәрҙең, бигерәк тә хроник ауырыуҙарҙың, таралыу хәүефен кәметеү. 2024 йылда шулай уҡ Дәүләт гарантиялары программаһы киңәйтелә, был эш биреүселәргә урындарҙа диспансер күҙәтеүе үткәреү мөмкинлеген бирә. Бының өсөн предприятие етәкселәре хеҙмәткәрҙәр исемлеген төҙөй, медицина ойошмалары менән тикшереү графигы һәм форматы хаҡында килешә. Башҡортостан Башлығы Радий Хәбиров республика Һаулыҡ һаҡлау министрлығы коллективына был йүнәлештәге һөҙөмтәле эше өсөн рәхмәт белдерҙе. Фото: Башҡортостан Башлығы сайты.