Һәр башланғысҡа нигеҙ ғаиләлә һалына

Донъялағы һәр кем өсөн тыныслыҡтан да, өйҙәге тыныс мөхиттән дә, ғаилә именлегенән дә, ундағы яҡшы мөнәсәбәттәрҙән дә, балалар сәләмәтлегенән дә ҡәҙерлерәк нәмә юҡ. Ошоларҙың барыһы ла кеше бәхетен хасил итә. Һәр ата-әсә өсөн иһә илһөйәр, иғтибарлы, ихтирамлы һәм эшһөйәр бала тәрбиәләү зарур. Ә быларҙың барыһына ла ғаиләләге һәр кемдең нисек аралашыуы, тормош һикәлтәләрендә бер-береһенә терәк булыуы йоғонто яһамай ҡалмай. 18 августа республиканан ғаиләләр Өфөләге “Торатау” конгресс-холында үткәрелгән “Родные-Любимые” форумына йыйылды. Сараны балалар һәм йәштәр Бөтә Рәсәй “Беренселәр хәрәкәте” ижтимағи-дәүләт ойошмаһы, Башҡортостандың Мәғариф һәм фән, Ғаилә, хеҙмәт һәм халыҡты социаль яҡлау министрлыҡтары үткәрҙе. Форум ғаилә берҙәмлектәре үҫеше өсөн мөхит булдырыу, Рәсәйҙәге иң яҡшы ғаилә тәжрибәләрен презентациялау, ғаилә йолалары һәм ҡиммәттәре нигеҙендә тәрбиә институттарына система ориентирҙарын файҙаланыуға индереү өсөн ойошторолдо. Сарала 6 – 17 йәшлек балалар һәм уларҙың ата-әсәһе (законлы вәкилдәре), өлкән йәшәтәге вәкилдәр ҡатнашты. – “Родные-Любимые” – беҙҙең һәр беребеҙ өсөн ҙур эш ул. Бөгөн, хәрәкәттең төрлө йүнәлештәре менән танышыуҙан тыш, бер ҙур ғаилә берҙәмлегенә берләшәсәкбеҙ. Ул республикалағы һәм илдәге беҙҙең хәрәкәткә үҫергә булышлыҡ итәсәк, – тип белдерҙе Башҡортостан Башлығының йәмәғәт башланғысында балалар һәм йәштәр йәмәғәт ойошмалары менән үҙ-ара эш итеү мәсьәләләре буйынса кәңәшсеһе Рәнис Хәсәнов. Башҡортостан Республикаһындағы Балалар хоҡуҡтары буйынса тулы хоҡуҡлы вәкил Ольга Панчихина ғаиләләргә мөхәббәт, изгелек, бәхет, именлек, барыһының да яҡшы булыуын, яҡындарының һәр саҡ эргәлә булыуын теләне. – Ғаиләләге һәр кемдең уй-фекерен хөрмәт итеү, ундағы мөнәсәбәттәр йылылығын һаҡлау мөһим. Йыш ҡына төрлө амбициялар һөҙөмтәһендә яҡындарыбыҙ тураһында ла онотоп ебәрәбеҙ. Бер-береңде нисек бар шулай ҡабул итергә, хөрмәт итергә кәрәк, сөнки ауыр ваҡытта яҡында эргәлә ҡала. Балалар менән даими һөйләшеү, өлкәндәр менән аралашыу тураһында оноторға ярамай, – тип кәңәштәрен бирҙе Ольга Юрьевна. – Беренселәр хәрәкәтенең тап ғаиләләрҙе берләштереүе шәп. Был хәрәкәттәр һәр муниципалитетта, илебеҙҙең һәр мөйөшөндә бар. Был илдә Рәсәй Президенты башланғысы менән барлыҡҡа килде. Был күренеш түгел, ә балаларҙы ла, өлкәндәрҙе лә берләштереү өсөн барлыҡҡа килгән ойошма. Республиканың ғаилә, хеҙмәт һәм халыҡты социаль яҡлау министры урынбаҫары Ирина Небогатова ныҡлы, татыу ғаиләнең һәр кем йөрәгендә һаҡланған төп ҡиммәттәрҙең береһе икәнлеген, уларҙың һәммәһенең үҙ йолалары барлығы, бөгөн тап ошондай 150 ғаиләнең залда йыйылыуы хаҡында белдерҙе. Әйткәндәй, быйыл Рәсәйҙә туғыҙынсы тапҡыр үткәрелгән “Йыл ғаиләһе” конкурсы Башҡортостанға еңеү килтерҙе. Конкурста 388 ғаилә ҡатнашты һәм уларҙың 88-е финалға сыҡты. Благовар районынан Яҡуповтар, “Ауыл ғаиләһе” номинацияһында беренселекте яуланы. Тәүге еңеүҙе Өфө ҡалаһынан күп бала тәрбиәләүсе Семеновтар яулаһа, быйыл Гөлнара һәм Альберт Яҡуповтарҙың ишле ғаиләһе республикаға танылыу килтерҙе. – Мәғариф системаһы өсөн ата-әсәләр берҙәмлектәре иң төп партерҙарҙың береһе булып тора. Республика ата-әсәләр советы ла ойошторолғайны. Иң мөһиме – бергәләп, ҡулға-ҡул тотоношоп балалаға уңайлы булған мәғариф һәм тәрбиә системаһы контурын булдырыу. Бөгөн ойошторлған һәр лекция, оҫталыҡ дәрестәре, аралашыуҙа һәр кем күңеленә яҡын шөғөл табыр тип ышанам, – тине республиканың мәғариф һәм фән министры урынбаҫары Инесса Косолапова Һәр бала өсөн төп миҫал, әлбиттә, уның ата-әсәһе. Уларҙың ниндәй ҙә булһа мәсьәлә буйынса фекере, ғәмәле – барыһы ла балалар күңелендә мәңгегә уйылып ҡала. Ғаилә – Беренселәр хәрәкәтенең йәш быуын вәкилдәрен тәрбиәләүҙәге төп партнеры. Өфөлә үткәрелгән сара заман ата-әсәләрен балалар тәрбәиләү буйынса төрлө мәсьәләләрҙе хәл итеү, тәжрибә менән уртаҡлашыу, ғаилә ҡиммәттәрен нығытыу урынына әүерелде. ФЕКЕРҘӘР: Лилиә менән Марсель МӨХӘМӘТЙӘНОВТАР, Шишмә районы: – Улдарыбыҙ Рамзан һәм Ризуан менән килдек. Икебеҙ ҙә бизнес өлкәһендә. Беребеҙ – Шишмә районы ҡатын-ҡыҙҙар эшҡыуарҙары ассоциацияһы етәксеһе, икенсебеҙ ҙә эшҡыуар. Балаларыбыҙ әүҙем, төрлө сараларҙа әүҙем ҡатнаша. Шуға күрә Беренселәләр хәрәкәтенә ҡушылдыҡ. Ярты йыл элек кенә был хәрәкәткә ҡушылһаҡ та, киләсәктә лә дауам итербеҙ тип уйлайым. Балаларыбыҙҙы дөрөҫ тәрбиәләү, уларҙа илһөйәрлек сифаттапрын булдырыу мөһим. Бөгөн бигерәк тә заман йәштәре тәрбиәле булырға тейеш тип иҫәпләйбеҙ. Айгөл һәм Альбер ҠОЛОШОВТАР, Стәрлетамаҡ районы: – Ҡыҙҙарыбыҙ Азалия, Амелия менән Беренселәр хәрәкәтенә ҡушылдыҡ. Форум сиктәрендә үткәрелгән лекциялар, осрашыуҙар ғаиләләр өсөн ҡыҙыҡлы ғына түгел, файҙалы ла булды. Автор фотолары.