Әбйәлилдә матайҙа йөрөгән 69 йәшлек апайҙы яуаплылыҡҡа тарттырғандар

Башҡортостан Дәүләт автоинспекцияһы етәксеһе Владимир Севастьянов социаль селтәрҙәге сәхифәһендә хәбәр итеүенсә, мотоциклда йөрөгән 69 йәшлек ҡатын яуаплылыҡҡа тарттырылған, быға социаль селтәрҙә ҡуйылған видеояҙма сәбәпсе булған. – Әбйәлил районының Дәүләт автоинспекцияһы интернет селтәрен күҙәтеү барышында оло йәштәге ҡатындың шлемһыҙ мототранспорт менән идара итеүе тураһында видеояҙма тапты. Асыҡланыуынса, видеола быға тиклем юл хәүефһеҙлеге йәһәтенән закон боҙоуға бәйле бер ниндәй ҙә мәсьәләләре булмаған 69 йәшлек Геологоразведка ауылы кешеһе төшөрөлгән. Хеҙмәткәрҙәр ҡатын менән осрашты, улар ике тәгәрмәсле транспортта йөрөүҙә һаҡланыу сараларын ҡулланыуҙың мөһимлеген билдәләп, иҫкәртеү әңгәмәһе үткәрҙе. Мотоциклдар һәм мопедтар иң хәүефле транспорт сараларының береһе булыуына айырыуса иғтибар йүнәлтелә. Әңгәмә барышында оло йәштәге ҡатын үҙенең мотошлемын күрһәтә һәм ул көндө ике тәгәрмәсле транспортта уны кеймәйенсә 100 метр самаһы юл үтеүе сәбәбен аңлата – был видео өсөн генә эшләнгән, уны үтеп барыусылар төшөрөргә теләгән. Ул һәр ваҡыт юл хәрәкәте ҡағиҙәләрен үтәргә тырышыуы тураһында һөйләгән һәм быны үҙенең водитель стажы менән раҫлаған – яҡынса 50 йыл, 1974 йылда “А” категориялы танытма алғандан алып. Уның һүҙҙәренсә, ошо йылдар дауамында ул бер ҡасан да бындай хоҡуҡ боҙоуҙарға юл ҡуймаған. Дәүләт Автоинспекцияһы хеҙмәткәрҙәре РФ Административ хоҡуҡ боҙоуҙар кодексының 12.6-сы статьяһы буйынса административ материал төҙөнө, ул мотоцикл йәки мопед менән мотошлемһыҙ идара иткән өсөн яза биреүҙе күҙ уңында тота. Ҡатын быны аңлап ҡабул иткән һәм башҡаса һаулығын ҡурҡыныс аҫтына ҡуймаясағын һәм һәр ваҡыт законға буйһонасағын белдергән. Был осрашыу Дәүләт автоинспекцияһы хеҙмәткәрҙәренә граждандарға юл хәрәкәте ҡағиҙәләрен үтәүҙең мөһимлеге хаҡында иҫкәртергә мөмкинлек бирҙе, айырыуса мотоцикл кеүек хәүефле транспорт төрөн идара иткәндә, – тип белдерҙе Владимир Севастьянов. 50 йыл мотоциклда йөрөгән апай быға тиклем бер ҡасан да ундай хәлгә ҡалғаны булмаған. Был осраҡ видеояҙмаға, фотоға төшкән саҡта уның эҙемтәләре тураһында ла уйлап эш итергә кәрәклегенә һабаҡ булды. Фото: БР Дәүләт автоинспекцияһының видеояҙмаһынан скриншот.