Милли геройыбыҙҙың исеме - халыҡ телендә

Республикабыҙ халҡы легендар комдив, Рәсәй Геройы Миңлеғәле Шайморатовтың тыуыуына 125 йыл тулыуҙы билдәләне. Ошо уңайҙан “Башҡортостан” гәзите флешмоб ойошторғайны. Унда олоһо ла-кесеһе лә Шайморатов генерал тураһында үҙҙәренең белемен һәм һәләтен күрһәтте. Иң мөһиме - бер кем дә юғалып ҡалманы һәм батырыбыҙ менән ғорурланыуҙарын йәшермәне. Барыбыҙға ла мәғлүм: Рәсәй Президенты Владимир Путиндың 2020 йылдың 30 мартындағы Указы менән “1941—1945 йылдарҙағы Бөйөк Ватан һуғышы осоронда немец-фашист илбаҫарҙары менән көрәштә күрһәткән ҡыйыулығы һәм батырлығы өсөн” Миңлеғәле Шайморатовҡа үлгәндән һуң “Рәсәй Федерацияһы Геройы” тигән юғары исем бирелде. 2019 йылдың 19 декабрендә Башҡортостан Республикаһы Дәүләт Йыйылышы — Ҡоролтайҙа Башҡортостандың Шайморатов орденын булдырыу тураһында һорау ҡаралды һәм уның статусы раҫланды. 2019 йылдың 28 июнендә V Бөтә донъя башҡорттары ҡоролтайында Башҡортостан Башлығы вазифаһын ваҡытлыса башҡарыусы Радий Хәбиров Өфөлә Совет майҙанында легендар генерал Миңлеғәле Шайморатовҡа һәйкәл ҡуйыласағын белдерҙе һәм был башланғыс өс йылда тормошҡа ашырылды ла. Ғөмүмән, легендар комдивтың исемен мәңгеләштереү, уға Рәсәй Геройы исемен ююлау йәһәтенән республика Башлығы Радий Хәбиров ғәйәт ҙур эш башҡарҙы. Бөгөн Шайморатов һәйкәле торған Совет майҙаны - республика халҡының яратҡан урыны. Рәсәй Геройының тыуған көнөндә "Башҡортостан" гәзите журналистары Нурзиә Хәсәнова менән Таңсулпан Рәсүл генерал Шайморатовтың лайыҡлы вариҫтары, ул-ҡыҙҙары менән шатланып әңгәмә ҡорҙо, ватандаштарының илһөйәр булыуҙары менән ихлас ғорурланды һәм гәзитебеҙ исеменән бүләктәр таратты. Ысынлап та, һәйкәл янында һәр ваҡыт тормош ҡайнай. Бында республиканың ғына түгел Рәсәйҙең дә төрлө төбәктәренән киләләр. Һәм, әлбиттә, улар бөгөнгөбөҙгә, тарихыбыҙға ҡарап һәр саҡ һоҡланыу белдерә. Илья Хардиков, Мәскәү ҡалаһы: – Ижад кешеһе булараҡ, шуны әйтәм: донъя кимәлендәге билдәле шәхестәр, таланттар тыуҙырған республиканы килеп күреүем менән бәхетлемен. Башҡорт мәҙәниәте, сәнғәте был яҡтан бик көслө булһа, Башҡортостан тарихи шәхестәре, яугирҙәре менән дә дан тота. Бына Шайморатов генералдың ғына батырлыҡтарын алып ҡарайыҡ, ҡасандыр ул фашистарҙы ҡырған урында, бөгөнгө көн батырҙары дошман менән алыша. Әлеге ваҡытта унда беҙ күҙ алдына ла килтерә алмаған яуҙар һәм батырлыҡтар ҡылына. Былар барыһы ла рухлы һәм илһөйәр булыуҙан, әлбиттә. Шуға күрә мин бөгөн Башҡортостан халҡына һәм республика Башлығы Радий Хәбировҡа ҙур рәхмәт белдерәм. Батырҙарығыҙ өсөн, юғары шәхестәрегеҙ өсөн. Республиканың сәскә атыуын, оҙон ғүмерле булыуын һәм тыныс күк йөҙө теләйем! Ул арала, Шайморатов һәйкәле янына тағы ла күберәк кеше ағылды. Тирә-яҡҡа шат тауыштар, балалар көлөүе һәм йыр-моң ағылды. Милли батырыбыҙ Миңлеғәле Шайморатовтың тыуған көнө... Тормош дауам итә! Автор фотоһы, видеоһы.