“Ауыл тренеры” остазға ярҙам иткән

АУЫЛ ТРЕНЕРЫ Йәшәйешебеҙҙең ниндәй генә тармағын алмайыҡ, ундағы уңыштарға нигеҙ һалыусылар, алға этәреүселәр бар. Уларҙы беҙ оло хөрмәт менән остаз тип йөрөтәбеҙ. Спорт өлкәһенә килгәндә, спортсыларҙың уңышы, нигеҙҙә, тренерҙарҙың эшмәкәрлегенә бәйле. “Республика райондарында спорт үҫешенә ҙур иғтибар бүләбеҙ. Был бик мөһим. Тап унда бөйөк атлеттар тыуа”, – тип белдергәйне Башҡортостан Башлығы Радий Хәбиров быйыл үткәрелгән Башҡортостан Башлығы ҡарамағындағы Физик культура һәм спорт үҫеше мәсьәләләре буйынса совет кәңәшмәһендә. Әйткәндәй, Рәсәйҙә Тренерҙар көнө лә булдырылған. Ул 30 октябрҙә билдәләнә. Был да үҙенә күрә ошо һөнәр эйәләренә иғтибарҙың артыуын күрһәтә. Уларҙың эшен тағы ҡеүәтләү өсөн республикала илдә тәүгеләрҙән булып “Ауыл тренеры” программаһы барлыҡҡа килде. Был проект республикала 2020 йылда Башҡортостан Башлығы Радий Хәбировтың башланғысына ярашлы ғәмәлгә инде. Республикабыҙ Рәсәйҙә ауыл ерендә эшләгән спорт тренерҙарына һәм остаздарына бындай ярҙам проектын уңышлы тормошҡа ашырған тәүге төбәк булды. Был программа буйынса ҡулаҡса түгел, ә сертификат бирелә. Уны торлаҡ (өй йәки фатир) өсөн ер биләмәһе һатып алыуға, йорт төҙөүгә, автомобиль транспортын һатып алыуға, белем алыуға тотонорға мөмкин. Һөҙөмтәлә был программа күптәргә ауылда төпләнергә булышлыҡ итә. Белгестәр билдәләүенсә, йәш белгестәрҙе ауыл еренә йәлеп итеүгә йүнәлтелгән был программа барлыҡҡа килгәс, спорт мәктәптәрендә эшләргә теләгән йәш тренерҙар һаны артҡан. Шулай итеп, республикабыҙҙың төрлө төбәктәренән спорт остаздары – балаларҙы сәләмәт тормош алып барыуға өндәүселәр – “Ауыл тренеры” сертификатын ала. Бына ошондай үҙенсәлекле бүләккә лайыҡ булыусылар араһында Дәүләкән районынан “Самбо-75” балалар һәм үҫмерҙәр спорт мәктәбе директоры тренеры Артур Туғашев та бар. Артур Тимерйәр улы – Рәсәй һәм Йәштәр юғары футбол лигаһы футбол арбитры ла. Бынан ике йыл элек Бөтә донъя балалар футболы көнөндә Башҡортостандың спорт министры Руслан Хәбибов Артур Туғашевҡа һәм тағы бер нисә тренерға “Ауыл тренеры” сертификатын тапшырғайны. Был уға һәм уның коллегаларына тағы ла дәртләнеберәк, ең һыҙғанып эшләү өсөн ҙур этәргес көскә эйә булды. Был матур ваҡиғаға ике йыл үткәс, Артур Тимерйәр улының программа буйынса бирелгән аҡсалата ярҙамды торлаҡ алыуға йүнәлтеүен асыҡланыҡ. – “Ауыл тренеры” программаһында ҡатнашыуыма шатмын. Һөҙөмтәлә үҙ мөйөшлө булдыҡ – тип ҡыуаныстары менән ихлас уртаҡлашты Артур Туғашев. – Был – йәш тренерҙар өсөн дәртләнеп, илһамланып эшләү өсөн шәп платформа. Кристина менән Артур Туғашевтар ғаиләһендә дүрт йәшлек Изабелла һәм йәш ярымлыҡ Тимур үҫә. Бәлки, улар ҙа киләсәктә ғәзиз атаһы кеүек тормошон спорт менән бәйләр? Барыһын да ваҡыт күрһәтер, әлбиттә, әлегә бәләкәстәр ата-әсә һөйөүенә наҙланып үҫә. – Дәртләнеп эшләү өсөн илһам сығанағына әйләнгән, үҙ мөйөшлө итергә булышлыҡ иткән “Ауыл тренеры”ның уңышлы тормошҡа ашырылыуына шатмын. Программаға ярашлы, биш йыл эшләргә тейешмен. Был ваҡыттың ике йылы үтте лә инде, әммә киләсәктә Дәүләкәндән күсеп китергә йыйынмайбыҙ, бында төпләндек, – ти Артур Тимерйәр улы. Тағы бер тапҡыр тренерҙарҙың балаларҙың уңышы менән ҡыҙыҡһыныуына һәм ихлас күңел менән эшләүенә шаһит булдыҡ. “Ауыл тренеры” – республикабыҙҙа күп кеше ҡатнашҡан спорттың үҫешенә булышлыҡ иткән шәп этәргес ярҙам сараһы. Артур Туғашев тренер булған футбол командаһы республика кимәлендә үткәрелгән ярыштарҙа призлы урындар яулаған. Киләсәктә Дәүләкән спортсыларының Башҡортостанбыҙ ғына түгел, Рәсәй кимәлендә лә уңышҡа өлгәшеүен күреп ҡыуанырбыҙ әле. Фотолар: Артур Туғашевтың шәхси архивынан. ФЕКЕР: – Алексей НИКИТИН, Дәүләкәндәге “Самбо-75” балалар һәм үҫмерҙәр спорт мәктәбе директоры: – Артур – үҙ эшен ихлас атҡарған треенерҙарыбыҙҙың береһе. Ундайҙар артынан балалар ҙа спорптҡа йәлеп ителә. Бына ошондай белгестәрҙең фиҙакәр хеҙмәте һөҙөмтәһендә районыбыҙҙа спорт тейешле кимәлдә, ә тәрбиәләнеүселәр төрлө кимәлдәге ярыштарҙа яҡшы һөҙөмтәләргә өлгәшә.