27 августа Өфөнөң Совет майҙанында Башҡортостан Башлығы Радий Хәбиров Рәсәй Геройы, генерал-майор Миңлеғәле Шайморатовтың тыуыуына 125 йыл тулыу уңайынан тантаналы сарала ҡатнашты.
Шайморатов ордены кавалерҙары клубы ағзалары ҡатнашлығында төбәк етәксеһе легендар комдив һәйкәленә сәскәләр һалды. Хәтерегеҙгә төшөрәбеҙ: 2022 йылдың 11 октябрендә асылған скульптур композиция 112-се Башҡорт кавалерия дивизияһы яугирҙарына һәм Тыуған ил өсөн башын һалған ватандаштарыбыҙға арналған.
Башҡортостан Башлығы шулай уҡ Миңлеғәле Шайморатов иҫтәлегенә һәм Өфөнөң 450 йыллығына арналған III «Геройҙар ваҡыты» Бөтә Рәсәй патриотик йыр конкурсында ҡатнашыусыларҙы сәләмләне.
– Бөгөн милли геройыбыҙ, генерал-майор Миңлеғәле Шайморатовтың тыуыуына 125 йыл. Тап ошо көндә беҙ өсөнсө тапҡыр патриотик йыр фестивален үткәрәбеҙ. Һәм уны Совет майҙанында ойоштороуыбыҙ дөрөҫ, сөнки бында 1942 йылдың февралендә Миңлеғәле Минһаж улына формалашыусы 112-се Башҡорт кавалерия дивизияһының хәрби байрағын тапшырғандар. Тап ошонан егеттәребеҙ махсус хәрби операцияға бурыстарын үтәргә юлланды, – тип һыҙыҡ өҫтөнә алды төбәк етәксеһе Радий Хәбиров. – Фестивалдә ҡатнашыусыларға һәм ҡунаҡтарға һеҙ бүләк иткән хистәр өсөн рәхмәт белдерәм. Жюри рәйесе Ольга Кормухинаға айырым рәхмәт һүҙҙәрен еткерәбеҙ, уны беҙ артист булараҡ бик яратабыҙ һәм Ватанының ысын патриоты булараҡ хөрмәт итәбеҙ. Минең артымда – Шайморатов генерал ордены кавалерҙары, үҙ ваҡытында башҡаларҙы яҡлау, батырлыҡ һәм фиҙаҡәрлек юлын һайлаған хәрбиҙәр һәм табиптар, журналистар һәм уҡытыусылар. Һәм улар менән бергә, әлбиттә, заман һынауҙарын һәм ҡатмарлыҡтарын мотлаҡ үтәсәкбеҙ.
«Геройҙар ваҡыты» конкурсында тотош илдән композиторҙар һәм автор-башҡарыусылар ҡатнашты. Быйыл Рәсәйҙең 36 төбәгенән 300-ҙән ашыу ғариза ҡабул ителгән. Жюриҙы, ғәҙәттәгесә, Рәсәйҙең атҡаҙанған артисы Ольга Кормухина етәкләне, ул шулай уҡ концерт программаһы менән дә сығыш яһаны.
– Ҡунаҡсыл Башҡортостанға конкурс өсөн рәхмәт, – тип билдәләне Ольга Кормухина. – Был фестиваль ғына түгел – ул бөйөк илдең бөйөк мәҙәниәте байрамы. Сәхнәлә төрлө халыҡтарҙың традициялары шул тиклем матур һәм органик үрелеп барҙы. Тап милли әҫәрҙәрҙән ҙур шатлыҡ кисерҙем – улар бик үҙенсәлекле, матур һәм мөһабәт яңғырай. Тамашасыларға ла, талантлы артистарға ла ҙур рәхмәт. Һәм, әлбиттә, геройҙарыбыҙ алдында баш эйәбеҙ.
Башҡортостан Башлығы Радий Хәбиров «Геройҙар ваҡыты» III Бөтә Рәсәй патриотик йырҙар асыҡ конкурсы еңеүселәренә наградалар тапшырҙы. Мәҫәлән, «Йыр авторы» номинацияһында беренсе урынды Өфөнән Рәмил Бәҙәмшин һәм Донецк Халыҡ Республикаһынан Елена Юрченко бүлеште. Иң яҡшы композиторҙар тип Өфөнән Олег Жданов һәм Архангельск өлкәһенән Людмила Зыкова табылды. «Һүҙҙәр авторы» номинацияһында Өфөнән Олег Миңлеғәлиев еңеү яуланы. Рәсәй Милли гвардияһы ғәскәрҙәренең өлгөлө-күрһәтмә оркестры начальнигы, Башҡортостандың атҡаҙанған артисы, полковник Азат Шахмөхәмәтов рәхмәт хаты менән билдәләнде.