Яҡынса мәғлүмәттәр буйынса, мессенджерҙарҙың береһендә зыян күреүсегә кадрҙар бүлеге директоры урынбаҫарынан хәбәр килгән. Унда документтар менән проблемалар килеп тыуыуын һәм уларҙы хәл итер өсөн тиҙҙән бәйләнешкә сығырға кәрәклеген иҫкәрткәндәр. Күп тә үтмәй, Өфөлә йәшәүсегә йәнәһе лә хоҡуҡ һаҡлау органдары “хеҙмәткәре” шылтырата. Ул, банк хеҙмәткәрҙәре әлеге ваҡытта аҡсаны законһыҙ күсереүгә юл ҡуймаҫ өсөн, ялған документтар буйынса кредиттар рәсмиләштереүҙәрен аңлата. Шулай уҡ енәйәтсе зыян күреүсенең паспортының фотоһын ебәрә: унда ҡултамға ла, фото ла булмай. Артабан уға тикшереү үткәреү һәм кредит тураһында документтар ебәрелә. Мутлашыусылар ошо хәлдән сығыу юлын да тәҡдим итә: кредитты ҡаплау өсөн яңыһын рәсмиләштереү кәрәк, тип аңлата. Зыян күрерүсе әйткәндең барыһын да үтәй һәм күрһәтелгән иҫәптәргә 1,6 миллион һумдан ашыу аҡса күсерә. Артабан мутлашыусы, зыян күреүсенең кредит тарихын тикшергәс, кире шылтыратырмын тип ышандыра. Киләһе көндә улар ысынлап та бәйләнешкә сыға. “Хоҡуҡ һаҡлау органдары хеҙмәткәре” тағы ла бер кредитҡа ғариза ебәрелгәне тураһында хәбәр итә һәм шундай уҡ схема буйынса эш итергә ҡуша. Һөҙөмтәлә зыян күреүсе тағы ла ике миллион кредит ала һәм мутлашыусыларҙың иҫәбенә күсерә. Артабан мутлашыусылар тағы ла клиентынан 800 мең һум итеп кредит алдыра. Өфөлә йәшәүсе уларға ышанып, аҡсаһын тағы күсерә. Тик енәйәтселәр бының менән генә туҡтап ҡалмай: улар клиентын кредит алыу ниәте менән финанс ойошмаларына ебәрә. Бәхеткә күрә, бөтә банктар ҙа кредит рәсмиләштереүҙән баш тарта. Шул ваҡыт аферистар ирҙең тормош иптәшенә лә кредит алырға маташыуҙарын хәбәр итә, һәм ирле-ҡатынлы банкка барып, тағы бер миллион һум кредит ала. Шул ваҡыт әңгәмә ваҡытында ҡатын иренең алданыуын аңлап ҡала. Һөҙөмтәлә улар полицияға мөрәжәғәт итә. Полиция тағы ла бер тапҡыр мутлашыусыларҙың оҫта манипуляторҙар булыуын иҫкә төшөрә. Әгәр һеҙгә хоҡуҡ һаҡлау органдарынан, финанс ойошмаларынан шылтыратып, шәхси мәғлүмәттәрегеҙҙе әйтһәләр, трубканы шунда уҡ һалығыҙ һәм мәғлүмәтте аныҡлау өсөн ойошманың рәсми телефон номерҙарына шылтыратығыҙ. Бер ҡасан да һеҙгә таныш булмаған кешеләрҙең күрһәтмәләренә буйһонмағыҙ! Фото һәм видео: Рәсәй Эске эштәр министрлығының Өфө ҡалаһы буйынса идаралығының матбуғат хеҙмәте.