Бөгөн халҡыбыҙҙың арҙаҡлы улы, легендар комдив, Рәсәй Геройы Миңлеғәле Шайморатовтың тыуыуына - 125 йыл. Республика 1948 йылдан алып Миңлеғәле Шайморатовҡа үлгәндән һуң Советтар Союзы Геройы исемен биреүҙе юлланы. Был мәсьәлә 2020 йылдың мартында ғына республика етәксеһе Радий Хәбировтың башланғысы менән хәл ителде. Рәсәй Президенты Владимир Путин һирәк осраған ҡарар ҡабул итте – үҙенең Указы менән Миңлеғәле Шайморатовҡа үлгәндән һуң Рәсәй Федерацияһы Геройы исемен бирҙе. 2022 йылдың 11 октябрендә Өфөләге Совет майҙанында Рәсәй Геройы, генерал-майор Миңлеғәле Шайморатовҡа һәйкәле асылды. Скульптура композицияһы 112-се Башҡорт кавалерия дивизияһы яугирҙәренә һәм тыуған иле өсөн ғүмерҙәрен биргән ватандаштарыбыҙға арналған. Генерал Шайморатов ордены 2019 йылдың 19 декабрендә “Башҡортостан Республикаһының дәүләт наградалары һәм маҡтаулы исемдәре тураһында”ғы Башҡортостан Республикаһы законына ярашлы булдырылды. Ул фиҙакәрлек һәм батырлыҡ күрһәткән өсөн тапшырыла: ғүмерен ҡурҡыныс аҫтына ҡуйған шарттарҙа хәрби, гражданлыҡ йәки хеҙмәт бурысын үтәгәндә; ғәҙәттән тыш хәлдәр ваҡытында кешеләрҙе ҡотҡарғанда; йәмәғәт тәртибен һаҡлауҙа. Генерал Шайморатов миҙалы Башҡортостан Башлығының 2023 йылдың 3 майындағы Указына ярашлы булдырыла. Радий ХӘБИРОВ: “Был мөһабәт һәйкәл менән беҙ халҡыбыҙҙың легендаһына, ғорурлығына, рухына, уның ҡаһарманлығы символына – генерал Миңлеғәле Минһаж Улы Шайморатовҡа мөрәжәғәт итәбеҙ. Беҙ ил Президенты Владимир Владимирович Путинға ихлас рәхмәт белдерәбеҙ, ул комдивҡа, үлгәндән һуң, Рәсәй Геройы исемен биреп, тарихи ғәҙеллекте тергеҙҙе”. Төп фото: glavarb.ru сайтынан. Рәмилә МУСИНА фотолары һәм коллажы.