Милли проект ярҙамында Белоретта уңайлы һәм заманса мөхит булдырыла

Белорет ҡалаһында төҙөлөш миҙгеле башланғандан алып йәмәғәт биләмәләрен төҙөкләндереүгә тотондолар. Ағымдағы йылда бында бер юлы бер нисә объектты ремонтлайҙар, улар иҫәбендә – Уҡытыусылар скверы, Ағиҙел күпере янында яр буйы, ҡала ЗАГСы янындағы биләмә һәм В. Блюхер исемендәге һәйкәл. Эштәр “Торлаҡ һәм ҡала мөхите” милли проектының “Уңайлы ҡала мөхитен булдырыу” программаһы сиктәрендә федераль бюджеттан финанслана. Мәҫәлән, бөгөнгө көнгә ЗАГС эргәһендә яңы йәмәғәт киңлеген төҙөү 90 процентҡа тамамланған. Проектҡа ярашлы, бында заманса фотозоналы ял зонаһы төҙөкләндерелә, шулай уҡ яҡтыртыу һәм видеокүҙәтеү системаһы ҡуйыла, яңы йәйәүлеләр юлдары һалына, биләмә йәшелләндерелә, эскәмйәләр һәм урналар ҡуйыла. 2022 йылда Белорет халҡы Блюхер исемендәге һәйкәл янындағы биләмә өсөн йыл һайын Рәсәйҙең Төҙөлөш министрлығы уҙғарған Бөтә Рәсәй рейтинг онлайн тауыш биреүендә тауыш бирҙе. Уны дүрт этапта төҙөкләндерергә хәл ителде, шуларҙың өсәүһе тормошҡа ашырылды ла инде – һәйкәл янында балалар спорт майҙансығы, яңыртылған юлдар, видеокүҙәтеү һәм яҡтыртыу системалары барлыҡҡа килде, ә 13-сө мәктәп янында, хоккей ҡумтаһы янында, һырғалаҡта шөғөлләнеүселәр өсөн сисенеү бүлмәһе менән йылы модуль ҡуйылды. Быйыл һуңғы этап тамамлана, уның барышында һыу баҫымы колонкаһы янында ҙур булмаған биләмә төҙөкләндерелә. “Уңайлы ҡала мөхитен булдырыу” федераль проектын тормошҡа ашырыу барышында 2019 йылдан Башҡортостан Республикаһында 683 йәмәғәт киңлеге төҙөкләндерелгән. Ағымдағы йылда төбәктә тағы ла 123 объектта төҙөкләндереү эштәре алып барыла. Билдәле булыуынса, “Торлаҡ һәм ҡала мөхите” (национальный проект “Жилье и городская среда”) милли проекты Рәсәй Президенты Владимир Путиндың май указы менән булдырылды. Фото: Торлаҡ-коммуналь хужалыҡ министрлығы.