Мәләүез ҡалаһында элекке һәм бөгөнгө хәрбиҙәрҙе берләштергән бихисап ойошмалар булдырылған. Армияла хеҙмәт итеү генә ил алдындағы бурысты үтәү түгел: күңеленә илһөйәрлек тойғоһо һалынған ысын ир-егет ғүмере буйы Ватаны алдында биргән антына тоғро булып ҡала. Шуға күрә бөгөн шул ойошма ағзаларының күптәре - махсус хәрби операция биләмәһендә. МХО-ла йөрөгән һәр яҡташтың отпуск ваҡытында ирекмәндәр менән осрашыуы йолаға әйләнгән, тылдағыларҙың ярҙамы уларҙың рухын күтәрә, еңеүгә ышанысын арттыра. “Кипа” ла селтәр үреү цехында ирекмәндәр менән осрашты, уларҙың изге теләктәрен ишетте. “Ҡыпсаҡ ырыуынан булыуым менән ғорурланам. Ҡартайымдың атаһы Шәйхелислам Әлмөхәмәтов олатай аҫаба булған, бай йәшәгән. 1817 йылғы иҫәп алыу ҡағыҙҙарында шул турала ентекле яҙылған. Ағайым Азат Әлмөхәмәтов Афған һуғышында ҡатнашты, үҙемә лә ике тапҡыр Чечнялағы бәрелештәрҙә булырға тура килде”, - ти уҙаман. Илдә тиҙерәк тыныслыҡ урынлашыуын, үҙе һәм Башҡортостан яугирҙәренең имен-аман ғаиләләренә әйләнеп ҡайтыуын теләп, "Кипа" тыуған ауылы Һарышта ҡорбан салдырып, доғалар уҡытҡан, ауылдаштарын һыйлаған, ҡала мәсетенә инеп хәйер биргән. “Десантсылар һәр саҡ алғы һыҙыҡта. Беҙ бит гел алға барабыҙ, артҡа сигенеү юҡ. Шул яуҙарҙа мине “Фатиха” доғаһы ғына һаҡланы”, - ти ул. “Батальон” йәмәғәт ойошмаһы рәйесе вазифаһы вәкәләттәрен ул ваҡытлыса “Батырлыҡ” ордены кавалеры, заманында хәрби хәрәкәттәрҙә ҡатнашҡан Рим Вәлиуллинға тапшырған. Иғтибарлы етәксе, йәмәғәт эштәренең уртаһында ҡайнап йөрөгәнгә ял мәлендә лә кеше проблемаһын ишетә белә: күҙ алдында Фәнис Бикташев менән МХО биләмәһендәге яугирҙәрҙең теләген бойомға ашырҙы - контракт төҙөп хеҙмәт иткән танкисҡа сәпкә теүәл тейгәнде билдәләү маҡсатында монитор итеп ҡулланыр өсөн шыйыҡ кристаллы ҙур телевизор юллашты. “Беҙ - яугирҙәр һәм тылдағылар бөтөн бер сылбыр кеүек, бер урыны ла өҙөлөргә тейеш түгел. Һеҙҙең ярҙам һалдат ғүмерҙәрен ҡотҡара”, - ти “Кипа”. Физик, рухи яҡтан сыныҡҡан ир-уҙаман яуҙың ауырлыҡтарын ҡабул итә, еңеүҙең беҙҙең яҡта буласағына ла иманы камил.