Пакуль увесь свет сачыў за Алімпійскімі гульнямі ў Парыжы, на палях Капыльшчыны таксама ішлі сапраўдныя спаборніцтвы – уборка збожжавых і зернебабовых не спынялася ні на хвіліну. У нас свае чэмпіёны – хуткасць працаўнікоў сельгаспрадпрыемстваў толькі здзіўляе: праз кожныя тры дні з’яўляюцца навіны пра новую тысячу тон намалочанага ці звезенага зерня. Таму жнівень ужо распачаў марафон "Дажынак". Першымі іх прыймала УП "ПІК-Лясное".
Лясноўскі дом культуры і вольнага часу прымаў гасцей свята. На кожным кроку – тэматычныя фотазоны з лаўкамі і сталом з самаварам, батуты і гульні для самых малодшых, лялечны "вусаты гаспадар", які чакаў хлебаробаў каля актавай залы, вырабы працаўнікоў Капыльскага раёна з дрэва і бісеру, вазы, упрыгожаныя каляровымі ніткамі. Гаспадары вынеслі ў кошыках і ўраджай са свайго агарода.
Людзі займаюць месцы ў актавай зале – з хвіліны на хвіліну пачнецца ўрачыстае святкаванне. Вольных месцаў засталося няшмат, нягледзячы на тое, што частка працаўнікоў усё яшчэ занята на КЗС і ў полі – дапамагаюць з уборкай сельгаспрадпрыемствам як Капыльскага, так і Смалявіцкага раёнаў. Але не хвалюемся – свой каравай з ураджаю 2024 года ім перададуць з рук у рукі.
За добры настрой працаўнікоў адказваў поп-фальк гурт "Вясёлы балаган" Старобінскага ГпДК. Нават карэспандэнт падпявала таленавітым артыстам. Вядучы Мікалай Холад павітаўся з гасцямі і шчыра павіншаваў усіх, хто сустракаў світанак у кабіне грузавой машыны ці камбайна і вяртаўся з працы на захадзе сонца – дзякуючы няспыннай працы хлебаробаў УП "ПІК-Лясное" скончыла ўборачную з добрымі рэзультатамі.
Першае слова – дырэктару сельгас-прадпрыемства Леаніду Буцевічу:
– Сёння ў нас свята, і вельмі прыемна бачыць поўную залу людзей. За гэты сезон мы сабралі 17 145 тон зерня, дасягнулі высокіх паказчыкаў ураджайнасці – 48,7 ц/га і ўвайшлі ў топ сельгаспрадпрыемстваў – лідараў раёна. У нашай гаспадарцы два камбайнеры-двухтысячнікі, тры вадзіцелі-трохтысячнікі, такія вынікі – дасягненне ўсіх працаўнікоў сельгаспрадпрыемства. Шчыра дзякую вам за дапамогу ў гэтым сезоне. Аднак праца на гэтым не спыняецца – дзейнічае КЗС, корміцца жывёла, пачынаецца падрыхтоўка да сезона 2025 года. Я ўпэўнены, што і ў наступным годзе мы не збавім хуткасць, а паказчыкі ўраджайнасці будуць радаваць.
Вяскоўцаў са святам павіншавала першы намеснік начальніка ўпраўлення па сельскай гаспадарцы і харчаванні райвыканкама Наталля Філіновіч:
– Хацела падзякаваць вам за ўборачны сезон. Сапраўды, у гэтым годзе вы добра папрацавалі, зрабілі каштоўны ўклад у каравай Капыльскага раёна, атрымалі добрую ўраджайнасць: вышэй за раённыя і абласныя вынікі. З кожным годам прадпрыемства паляпшае паказчыкі, дзякуючы добраму кіраўніцтву і вашай плённай і няспыннай працы, паважаныя хлебаробы. Не спыняйцеся на дасягнутым, адточвайце прафесіяналізм. Ну і, канечне, здароўя вам і шчасця.
Як сыплецца зерне ў амбары, так і добрыя словы гучалі ў адрас хлебаробаў. Падзяку за мэтанакіраванасць падчас жніва выказалі намеснік дырэктара па раслінаводстве Аляксандр Пнеўскі, начальнік участка "Бабоўня" Анатоль Семяновіч і галоўны эканаміст Алег Лазюк.
Узнагародзілі і лепшых працаўнікоў сёлетняй уборачнай. Падзякай адзначаны Міхаіл Мароз, Дзмітрый Клачко, Сяргей Мікуліч, Аляксандр Рокач. Ганаровую грамату ўручылі Сяргею Клачко і Аляксандру Емельяновічу. Леанід Буцевіч шчыра падзякаваў працаўнікам за плённасць і мэтанакіраванасць і пажадаў у наступным годзе не спыняцца і працаваць на карысць "ПІК-Лясное".
"Перш папрацуй, а тады й патанцуй," – так гаворыць народная мудрасць. А выдатнікі ўборачнага сезона прадпрыемства могуць дазволіць сабе і шумна адпачыць. На сцэне – "Вясёлы балаган", у зале – вяселыя аграрыі. І пачаліся песні-танцы: як песні гурта з фальклорнымі матывамі, так і хіты групы "Дразды". "Хату бацькоў" спяваў кожны. А пад такі настрой можна пасмакаваць хлеб, спечаны з мукі ўраджаю-2024. Смачны каравай – гонар хлебаробаў.
Шуміць Лясное "Дажынкамі". І хай у наступным годзе залацяцца каласы палёў, амбары поўняцца зернем, а надвор’е спрыяе добрай уборачнай. Віншуем, "ПІК-Лясное"!
Ганна МАТУСЕВІЧ, студэнтка факультэта журналістыкі БДУ
Фота аўтара
В УП "ПИК-Лесное" состоялись дожинки - главный праздник хлеборобов
