ҒАИЛӘЛӘРҘЕ ЯҠЛАУ Рәсәйҙә туғыҙынсы тапҡыр үткәрелгән “Йыл ғаиләһе” конкурсы быйыл да Башҡортостанға еңеү килтерҙе. Конкурста 388 ғаилә ҡатнашып, уларҙың 88-е финалға сыҡты. Благовар районынан Яҡуповтар, “Ауыл ғаиләһе” номинацияһында еңеү яулап, яҡташтарын һөйөндөрҙө. Федераль кимәлдәге “Йыл ғаиләһе” бәйгеһе 2016 йылдан үткәрелеп килә һәм йыл һайын республиканың өлгөлө, талантлы ғаиләләре еңеү яулай. Тәүге еңеүҙе Өфө ҡалаһынан күп бала тәрбиәләүсе Семеновтар яулаһа, быйыл Гөлнара һәм Альберт Яҡуповтарҙың ишле ғаиләһе республикаға танылыу килтерҙе. – Беҙҙең төбәктә ауыл халҡы күпселекте тәшкил итә, унда традициялар, милли ҡиммәттәр яҡшы һаҡланған, шул иҫәптән ҙур ғаиләләр ҡороп йәшәү ҙә. Шуға күрә республика был йәһәттән – өлгөлө төбәк, – тип билдәләне ғаилә, хеҙмәт һәм халыҡты социаль яҡлау министры Ленара Иванова. Ысынлап та, ғорурланыу өсөн нигеҙ бар. Былтыр Бөтә Рәсәй “Йыл ғаиләһе” конкурсында “Традицияларҙы һаҡлаусы ғаилә” номинацияһында дүрт бала тәрбиәләгән Әхмәровтар ғаиләһе еңеп сығып, бөтә Рәсәйҙә билдәлелек яуланы. Бәхеткә ҡаршы, татыулыҡта һәм берҙәмлектә донъя көткән, балаларында хеҙмәткә һөйөү һәм маҡсатҡа ынтылыш тәрбиәләгән ғаиләләр беҙҙә етерлек. Рәсәй Президентының ҡарарына ярашлы, күп балалы ғаиләләрҙең рәсми статусы һәм социаль ярҙам саралары бөтә ил буйынса раҫланған. Беҙҙең республикабыҙҙа ғына бындай ишле ғаиләләр 59 мең тәшкил итә. Федерация Советының фән, мәғариф һәм мәҙәниәт буйынса комитеты Рәйесе, Бөтә Рәсәй “Йыл ғаиләһе” конкурсының ойоштороу комитеты рәйесе Лилиә Ғүмәрова әйтеүенсә, был осорҙа “Йыл ғаиләһе” ябай конкурс булып ҡына ҡалмай, тағы ла нығыраҡ үҫешеп, юғарыраҡ кимәлгә күтәрелде. –Конкурста ҡатнашыусылар һәм еңеүселәр рәсәйҙәрҙе ныҡлы, ишле, күп быуынлы ғаиләләр тыуҙырыуға дәртләндерә, күптәр өсөн ғаилә ҡиммәттәрен һаҡлау, илһөйәрлек һәм әүҙем оҙайлы ғүмергә бирелгәнлек өлгөһө булып хеҙмәт итә. 88 төбәктә һайлап алып турҙары үтте, – тине Лилиә Ғүмәрова. Яҡуповтар дүрт ул тәрбиәләп үҫтерә. Яҙмыш йәштәрҙе 2010 йылдың 18 февралендә, Гөлнараның апаһы туйында таныштыра. Тәү ҡараштан уянған мөхәббәт тойғоһо ваҡыт үтеү менән көсәйә генә бара. Егет Дүртөйлө һылыуына өйләнешергә тәҡдим яһай. Шулай итеп, яңы ғаилә – Яҡуповтар ғаиләһе барлыҡҡа килә. Тәүге улдарына Амиль тип исем ҡушалар, ике йылдан Эмиль исемле тағы бер улдары донъяға килә. Йәштәрҙең тормошо түңәрәкләнә төшә, тынғыһыҙ һәм күңелле көндәр башлана. Улдары балалар баҡсаһына йөрөй, ә йәш ата-әсә иркен, заманса уңайлыҡтары булған йорт төҙөүгә тотона. Улдарының үҙ бүлмәһе, биләмәлә ихата, мунса барлыҡҡа килә. Ғаилә ҡотон арттырып, өсөнсө улдары Аллен донъяға килә. Ә дүртенсе улдарына атай кеше танылған композитор Таривердиевтың исемен ҡушырға була, шулай итеп, Яҡуповтарҙың Микаэль исемле улдары ла бар. Башҡортостан Волга буйы федераль округы төбәктәре араһында күп балалы ғаиләләр һаны буйынса лидерлыҡты тота. Һуңғы ун йыл эсендә уларҙың һаны 27,5 процентҡа артты. ”Балалар тәрбиәләгән 230 меңдән ашыу ғаилә төрлө льготаларҙан файҙалана, ә баланың тыуыуы һәм тәрбиәләү буйынса айлыҡ пособие түләүҙәренә быйыл 25 миллиард һумдан ашыу аҡса йүнәлттек”, – тип билдәләне республика етәксеһе Радий Хәбиров кәңәшмәләрҙең береһендә. Шуныһы ҡыуаныслы, ата-әсәләрҙең күбеһе ғаиләлә бала тыуыуына һәм уларҙы лайыҡлы тәрбиәләүгә яуаплы ҡарай. Быға миҫалдар бик күп. Ил һәм Башҡортостан етәкселеге әсәлекте, атайлыҡты һәм балалыҡты яҡлауға ҙур иғтибар бирә һәм социаль яҡлау сараларын йылдан-йыл арттыра килә. Һәр ғаилә бала тыуғандан алып бәлиғ булғанға тиклем һәр этапта ярҙамға иҫәп тота ала. Һүҙ бында төрлө льготалар һәм пособиелар рәүешендәге матди ярҙам тураһында ғына түгел, ә йәшәү өсөн мөһим хеҙмәттәр һәм тауарҙар тураһында ла бара. Алда әйтеп үтелгән мауыҡтырғыс “Йыл ғаиләһе” конкурстары, ярыштар, ата-әсәләрҙе дәртләндереү саралары ла сәләмәт һәм тотороҡло йәмғиәт төҙөү, яуаплы, хеҙмәт һөйөүсән, илһөйәр граждандар тәрбиәләп үҫтереү өсөн нигеҙ булып хеҙмәт итә. Башҡортостан Башлығы Радий Хәбиров: “Башҡортостан Хөкүмәте ғаиләләр балаларын уңайлы шарттарҙа тәрбиәләп үҫтерә алһын өсөн даими һәм эҙмә-эҙлекле рәүештә шарттар тыуҙырасаҡ. Эргәлә генә етерлек һанда яңы яҡшы мәктәптәр һәм балалар баҡсалары булһын өсөн. Балалар яҡшы спорт һәм уйын майҙансыҡтарында уйнай алһын өсөн. Улар сәләмәт, ҡыҙыҡһыныусан булып үҫһен, беҙҙең институттарға уҡырға инә алһын, эш тапһын һәм үҙ ғаиләләрен ҡорһон өсөн тырышасаҡбыҙ”. Фото:Ғаилә,хеҙмәт һәм халыҡты социаль яҡлау министрлығы.