МӘҘӘНИӘТ Башҡортостан халҡы сәнғәтте ярата, талантлы кешеләре лә иҫәпһеҙ-һанһыҙ. Шуғалыр ҙа, мәҙәни сараларға йөрөгән халыҡ һаны буйынса ла республикабыҙ Рәсәйҙә иң алдынғылар рәтендә бара. Ғөмүмән, был тармаҡ республикабыҙҙа йылдам үҫешә, өр-яңы проекттар менән байытыла. Бындай ыңғай күренештәрҙең дәүләт булышлығынан тыш килеп сыға алмаҫы һәр кемгә асыҡ. Шатлыҡҡа күрә, республика етәксеһе халыҡтың күңел ихтыяждарын ҡәнәғәтәндерер тармаҡҡа даими иғтибар күрһәтә, уның шәхси башланғыстары әллә күпме яҡшы үҙгәрешкә нигеҙ һалды. Ауыл мәҙәниәтенә ҡағылышлы ул: “Мәҙәниәт йорттары буйынса артабанғы эштәрҙе әүҙемләштерергә кәрәк, улар төрлө хәлдә”, – тигәйне. Һәм был эш, ысынлап та, дауам итә, клубтар яңыра, улар заманса төҫ ала бара. Салауат районының Мөрсәлим ауылы ла – быға сағыу дәлил. Кино сәнғәте булһынмы, йырмы, бейеүме, театр сәнғәте һәм башҡаларымы – республикабыҙҙа мәҙәниәт тармағының бер йүнәлеше лә ярҙамһыҙ ҡалдырылмай. Яңынан-яңы мәҙәни объекттар асыла, иҫкеләре төҙөкләндерелә, сәнғәт, музыка мәктәптәре йыһазландырыла, белгестәргә ярҙам бүленә, өр-яңы, ҡыҙыҡлы фестивалдәр уҙғарыла, улар йолаға әүерелеп китә. Ыңғай күренештәр Өфөлә, башҡа ҙурыраҡ ҡала, ҡасабаларҙа ғына түгел, шуныһы айырыуса шатландыра. Ауылдарҙағы рухи тормош та һүнмәй, киреһенсә, яңы дәрт, яңы һулыш менән дауам итә. Бының өсөн ауылдарҙа иң беренсе нимә кәрәк? Әлбиттә, яҡшы мәҙәниәт учреждениеһы, халыҡты үҙе янында йыйыр, туплар, бергә ойошторор усаҡтар. Бөгөнгө мәҡәләлә ошоно Салауат районының Мөрсәлим ауылы миҫалында ҡарайыҡ. Бында 2020 йылдың ҡышында яңы мәҙәниәт йорто асылды. Уны төҙөүгә аҡса дәүләт башлығы В. В. Путиндың 2018 йылдағы майында ҡул ҡуйған Указы буйынса барлыҡҡа килгән “Мәҙәниәт” милли проектына ярашлы бүленгән. Яңы мәҙәниәт йорто 700 квадрат метрҙан ашыу майҙанды биләй. Тамашалар залына 200 кеше һыя. Бында барыһы ла яңы – музыка, ут, мультимедиа ҡорамалдары, йыһаз. Заман талаптарына ҡулайлашырып төҙөлгән иркен бинала ижади түңәрәктәр, коллективтар эшләй, матур китапхана уҡыусыларын ҡаршылай. Бында кесерәк балалар ҙа, уҡыусылар ҙа, йәштәр ҙә, ғаиләләр ҙә, өлкән йәштәгеләр ҙә күңеленә ятҡан шөғөлдө таба ала. Мөрсәлимдә яңы клуб төҙөү мәсьәләһен 2018 йылдың көҙөндә үк, Салауат районына килгән сағында Башҡортостан Башлығы Радий Хәбиров иғтибар үҙәгенә алды һәм тиҙ арала был ҙур ауылға яңы заманса бина төҙөп ҡуйыу бурысын йөкмәтте. Ә бер йылдан саҡ ҡына ашыу ваҡытта Мөрсәлимдә яңы мәҙәни үҙәк ҡалҡып сыҡты. Быға ҡәҙәре иһә ауыл клубы XIX быуат аҙағында уҡ, әллә ҡайҙа ятып ҡалған 1895 йылда төҙөлгән тимер юлсылар бинаһында эшләп килә. Эштәр тамамланып, заманса бина ҡалҡып сығып, асылыр алдынан да республика етәксеһе уны үҙ күҙҙәре менән күреп китте. Матур яңылыҡ менән ул социаль селтәрҙә уртаҡлашты: “Бер йыл элек кенә әле, эш сәфәре менән бында булғанда, ҡурсаҡ театрының бәләкәс, әммә ныҡ һәләтле артистары шаршау артында тороп репетиция яһай ине. Ә хәҙер бында ана ниндәй зал һәм сәхнә!” Илнур ВӘЛИЕВ, Салауат районы хакимиәтенең мәҙәниәт бүлеге етәксеһе: – Мөрсәлим ауыл клубында 13 ижади берләшмә, өс түңәрәк эшләй: ҡатын-ҡыҙҙар, балалар вокаль ансамблдәре, “Умырзая” фольклор коллективы, йәштәрҙең, балаларҙың бейеү, балалар һәм өлкәндәрҙең театр коллективтары, балалар ҡурсаҡ театры, һүрәт төшөрөү, төрлө ҡул эштәре буйынса түңәрәктәр, өҫтәл уйындарын яратыусылар клубы. 2021 йылда Мөрсәлимдәге мәҙәниәт йортона “күп функциялы ауыл клубы” статусы бирелде. Уның эсенә ауыл биләмәһе китапханаһы, балалар сәнғәт мәктәбенең филиалы инә. Ул заманса ҡорамалдар, музыка ҡоралдары менән йыһазландырылды. Беҙҙең балалар ҡайһы бер сәнғәт төрҙәре буйынса әҙерлек ала: ҡурай, фортепиано, һынлы сәнғәт, музыкаль теория дәрестәре. Хореография класы асырға ла иҫәп тотабыҙ. Ғөмүмән, бөтә заманса талаптарға яуап биргән мәҙәниәт йорто асылғаны бирле, ауыл советы биләмәһендә үткәрелгән сараларҙың һаны ғына түгел, сифаты ла, төрҙәре лә артты, уларға йөрөүселәр һаны ла күҙгә күренеп күбәйҙе. Халыҡ иң теләп йөрөгән саралар – концерттар, театрлаштырылған тамашалар, спектаклдәр, уйын, күңел асыу программалары, ял итеү кисәләре. Рәүилә Ғатауллина. Фотолар: Мөрсәлим күп функциялы үҙәге төркөмөнән (vk.com/smfkmursalimkino?from=search)