Бөгөн – Умартасылар көнө. Байрамығыҙ менән, балсылар!

Һуңғы йылдарҙа халҡыбыҙҙың төп кәсептәренең береһе – умартасылыҡ менән шөғөлләнеүселәрҙең һаны арта. Күптәр был эшкә табышлы шөғөл тип ҡараһа, икенселәре күңел ҡушыуы буйынса килә. Әммә бал ҡорттарын аҫрау еңелдән түгел, умартасыларҙың үҙҙәренә лә нәҙекәйбилдәр кеүек көн–төн тир түгергә тура килә. Татлы балды ашауы ғына рәхәт шул, ә уны булдырыу өсөн ете ҡат тиреңде сығарырға кәрәк әле. Хәйбулла районы Бүребай ауылынан Ҡорбанғәле Иғдәүләтов 2009 йылдан умарта тота башлай. Оҙаҡ йылдар Бүребай тау–байыҡтырыу комбинатында эшләп, хаҡлы ялға сыҡҡас, ҡайныһынан өйрәнеп, ҡортсолоҡҡа тотона. Бөгөн уның 25 умартаһы бар. — Ҡайным Зөфәр Сәлихйән улы Урыҫбай ауылында күпләп умарта тота. Тәүҙә ҡыҙыҡһынып ҡына уның эшен күҙәтә инем, аҙаҡ үҙем дә ярҙамлаша башланым. Ҡайнымдан ике умарта алып ултырттым, аҙаҡ ҡорттарым күбәйеп китте, – ти Ҡорбанғәле Динислам улы. Ҡасандыр үҙе ҡайныһына ярҙамлашһа, бөгөн уға кейәүе Рөстәм ҡортсолоҡта булыша. Бөрйән районынан булған кейәүенең ата–олатайҙары ла умартасы, шуға был шөғөл уға ят түгел. Әле бал ҡорттарының рәхәтләнеп осоуҙарына ҡарағанда, быйыл бал буласаҡ, тигән фекерҙә Бүребай умартасыһы. Шулай ҙа был шөғөлгә күңел йылыңды биреп, бар тырышлығыңды ҡушҡанда ғына мул уңыш алырға мөмкин. Автор фотоһы.