9 августа Рәсәй Президентының Волга буйы федераль округындағы тулы хоҡуҡлы вәкиле Игорь Комаров менән Башҡортостан Башлығы Радий Хәбиров Өфөлә донъя кимәлендәге Евразия фәнни белем биреү үҙәгенең вуз-ара студенттар кампусында булды. Ҡаланың тарихи өлөшөндәге заманса биналар комплексы “Фән һәм университеттар” милли проектына ярашлы төҙөлә. Эш сфәре мәлендә Рәсәй Президентының тулы хоҡуҡлы вәкиле Игорь Комаров һәм төбәк етәксеһе Радий Хәбиров вуз лабораториялары һәм инновация майҙансыҡтарының эше менән танышты. Улар иҫәбендә БДМУ-ның уҡыу кластары, “Киләсәк медицинаһы” кабинеты бар. Өфөнөң фән һәм технологиялар университетының майҙансыҡтарының береһендә алдынғы инженер мәктәбенең лабораторияһы һәм “Өң” киберфизика платформаһы оҫтаханаһы урынлашҡан. Ул пилотһыҙ осоу аппараттарын программалау, эксплуатациялау зонаһын, уйындар әҙерләү лабораторияһын, киберфизика оҫтаханаһын үҙ эсенә ала. ӨДНТУ иһә IQ-паркта “Ҡайнау нөктәһе” тигән ижади студенттар киңлеген асҡан. Башҡортостан Башлығы, кампустың икенсе өлөшөн төҙөү башланыуын билдәләне. 2025 йыл аҙағына тиклем майҙансыҡта ете бина төҙөү ниәтләнә. Уларҙа студенттар өсөн ятаҡтар,спорт һәм ижади зоналар буласаҡ. -Фәнни –белем биреү инфраструктураһын булдырыу – республикабыҙ үҫешенең мөһим йүнәлеше. Яңы студенттар кампусы – был өлкәлә иң яҡшы проекттарҙың береһе. Ул иҡтисадтың һәм социаль өлкәнең төрлө тармаҡтарына инновация ҡарарҙарын индерергә булышлыҡ итәсәк, - тине Башҡортостан Башлығы Радий Хәбиров. Игорь Комаров кампустың төбәктең инновация һәм иҡтисади үҫешенә өҫтәмә импульс бирәсәгенә ышанысын белдерҙе. Бында фән, креатив индустрия, заманса белем биреү әүҙем үҫешәсәк. Фото: Башҡортостан Башлығы сайты.